वीरगञ्ज । भरतपुर महानगरपालिका–२९ स्थित सिमलतालबाट शुक्रबार बिहान साढे तीन बजे त्रिशूली नदीमा खसेका दुई वटा बस अझै फेला परेका छैनन्। घटनास्थलमा नेपाली सेना, सशस्त्र प्रहरी, र नेपाल प्रहरीका गोताखोरसहित पाँच सय बढी सुरक्षाकर्मी परिचालन भएका छन्। शुक्रबार र शनिबार दिनभरको प्रयासपछि पनि बस फेला नपरेपछि आज बिहानैदेखि पुनः खोजी कार्य सुरु भएको छ।

चितवनका प्रमुख जिल्ला अधिकारी ईन्द्रदेव यादवले जानकारी दिएअनुसार, आजदेखि घटनास्थल र तल्लो तिरका सम्भावित स्थानहरूसँगै देवघाटसम्म खोजी कार्य जारी छ। दुईवटा बस फेला नपरेपछि आजबाट ठुलो चुम्बक (म्याग्नेट) को प्रयोग गरिने भएको छ। जिल्ला प्रशासन कार्यालय चितवनले एक सूचना जारी गरी अब ठूलो म्याग्नेटको सहायताले खोजी गरिने जानकारी दिएको हो।

शुक्रबारको घटनामा काठमाडौंबाट गौर जाँदै गरेको बागमती प्रदेश ०३–००१ख २४९५ नम्बरको बस र वीरगञ्जबाट काठमाडौं जाँदै गरेको बागमती प्रदेश ०३–००६ख १५१६ नम्बरको बस त्रिशूली नदीमा खसेका थिए। काठमाडौंबाट गौर आउँदै गरेको बसमा सवार २७ जना र वीरगञ्जबाट काठमाडौं जाँदै गरेको बसमा सवार २४ जना थिए।

शनिबार बेपत्ता यात्रीमध्ये तीनजनाको शव भेटिएको छ। नवलपरासीको गैँडाकोटस्थित नारायणी नदी किनारमा भेटिएका शवहरूमध्ये चितवन माडिका २२ वर्षीय विकास परियार र सर्लाही वरहथावा १९ वर्षीय रमित कुशर माझीको पहिचान खुलेको छ। परियार काठमाडौंबाट सर्लाही जाँदै गर्दा दुर्घटनामा परेका थिए भने माझी भरतपुरबाट काठमाडौँ जाँदै गर्दा दुर्घटनामा परेका थिए।

यसअघि, शनिबार पश्चिम चितवनको मेघौली गोलाघाटस्थित नारायणी नदीमा भेटिएको शव बसका यात्रु ऋषि पाल साहको भएको पुष्टि भएको थियो। खोजी कार्यमा बाँसका भाटा, एन्कर हुक, गोताखोर, ड्रोन, वाटर ड्रोन, र बाइनाकुलर टेलिस्कोपको प्रयोग भए तापनि बस अझै नभेटिएकोले आजदेखि ठूलो म्याग्नेटको सहायताले खोजी गरिने योजना रहेको छ।