वीरगञ्ज । मधेश प्रदेशमा हालैको सत्ता समीकरण फेरबदलपछि नेपाली कांग्रेस र नेकपा एमालेको गठबन्धनले नयाँ सरकार गठनको तयारी गरेको छ। यो गठबन्धनको कार्यान्वयनसँगै माओवादी केन्द्रसहितको एमाले गठबन्धन भत्किएको छ। मुख्यमन्त्री सतीशकुमार सिंहले कांग्रेस र एमालेको समर्थनमा विश्वासको मत प्राप्त गरेका छन्।

कांग्रेस, एमाले र लोसपा नेपालले नयाँ सरकार गठन गर्न मन्त्रालय बाँडफाँटमा छलफल जारी राखेका छन्। कांग्रेसले चार मन्त्रालय र लोसपाले दुई मन्त्रालयको अडान राखेपछि मुख्यमन्त्री सिंहले निर्णय गर्न सकिरहेका छैनन्। कांग्रेसले चारवटा मन्त्रालय पाएको भन्दै मन्त्रीहरुको नामसमेत टुंगो लगाएको छ। जनार्दनसिंह क्षेत्री, सुनिल यादव, शेषनारायण यादव र कौशलकिशोर राय कांग्रेसका तर्फबाट सम्भावित मन्त्रीको सूचीमा छन्।

लोसपाले दुई मन्त्रालय पाउनु पर्ने अडान लिएको छ। महासचिव परमेश्वर साहले लोसपाका तर्फबाट रानी कुमारी तिवारी र जैनुल राइनको नाम मन्त्री बन्ने सम्भावित सूचीमा रहेको बताए।

मुख्यमन्त्री सिंहले विश्वासको मत लिनुअगावै माओवादी केन्द्र, नेकपा एस, नागरिक उन्मुक्ति पार्टी र नेपाल संघीय समाजवादी पार्टीका ६ जना मन्त्रीलाई बर्खास्त गरेका थिए। सत्ता समीकरण बदलिएसँगै कांग्रेस र लोसपा सहभागी हुने तयारी भइरहेको छ।

मन्त्रालय बाँडफाँट सोमबार टुंगो लगाएर कांग्रेस र लोसपा सरकारमा सहभागी गराउने मुख्यमन्त्री सिंहको तयारी रहेको छ। कांग्रेस मधेश प्रदेश संसदीय दलका नेता कृष्णकुमार यादवले कांग्रेसले चार मन्त्रालय पाउने सहमति भएको बताएका छन्, तर मन्त्रालयको बाँडफाँटमा अन्योल कायमै छ।

नयाँ गठबन्धन अनुसार प्रदेश सरकारमा कांग्रेस र लोसपा सहभागी हुने छन्। कांग्रेस र एमाले गठबन्धनको निर्णय पहिलो पटक मधेश प्रदेशमै कार्यान्वयनमा आएको छ। सोमबार मन्त्रिपरिषद् पुनर्गठन गरी नयाँ मन्त्रीहरुलाई सपथ गराउने तयारी भइरहेको छ।