बारा । सिकेन्द्र साह । इलाका प्रहरी कार्यालय सिम्रौनगढ बारा अन्तर्गतको प्रहरी टोलीले मिति २०८१।०३।१४ गते राति २२:३० बजेको समयमा अवैध गाँजासहित दुई जनालाई नियन्त्रणमा लिएको छ। गोप्य सूचनाका आधारमा बागमती प्रदेश ०१-०२९ च ६७५२ नम्बरको योद्धा पिकअप गाडीबाट कलैया तर्फ अवैध गाँजा झार्ने प्रयास गरिरहेको जानकारी प्राप्त भएपछि प्रहरी निरीक्षक नविन राईको नेतृत्वमा खटिएको ७ जनाको टोलीले यो कार्य सफल बनाएको हो।

प्रहरी टोलीले जिल्ला बारा सिम्रौनगढ न.पा. ५ ठुलो ईटवालबाट उक्त गाडीलाई रोक्दा, गाडी चालक सुजन अधिकारी (२२ वर्ष, जिल्ला धादिङ निलकण्ठ न.पा. ८ निवासी) र उनको सहयोगी रमेश नेपाली (२३ वर्ष, जिल्ला धादिङ ज्वलामुखी गा.पा. १ निवासी) लाई पक्राउ गरेको छ। सोधपुछको क्रममा ती दुईले अवैध गाँजा सिम्रौनगढ न.पा. ५ ठुलो ईटवाल निवासी मनोज कुमार साहको घरमा राखेको जानकारी दिएपछि प्रहरीले साहको घरमा खानतलासी गर्दा २०१ के.जी. (१६ पोका) अवैध गाँजा बरामद गरेको छ।

बरामद अवैध गाँजा, गाडी र दुवै जनालाई नियन्त्रणमा लिएर प्रहरी कार्यालयमा ल्याई आवश्यक अनुसन्धान कार्य जारी रहेको छ। प्र. ज. बन्ती लाल बैठाले मिति २०८१।०३।१४ गते घटनाको विवरण दिएका हुन्। प्रहरीको यस सफलतापूर्ण कार्यले स्थानीय क्षेत्रमा चासो र चर्चा पाएको छ।