वीरगंज । नेपाल पत्रकार महासंघ रौतहट शाखाको कार्यालयमा अनिश्चितकालीन तालाबन्दी भएको छ। शुद्धिकरणको नाममा सदस्यहरुको निजीकरण गरिएको भन्दै क्रियाशील पत्रकारहरुले तालाबन्दी गरेका हुन्। रौतहटमा डेढ सयभन्दा बढी पत्रकारहरु सक्रिय रहेको अवस्थामा जम्मा ३५ जना सदस्य कायम रहनेगरी नवीकरण र शुद्धिकरण गरिएकोले पत्रकारहरु आक्रोशित बनेका छन्।

शाखाका पूर्वअध्यक्ष रविन्द्र साहको अगुवाईमा रौतहटका क्रियाशील पत्रकारहरुले आगामी असार २२ गतेको निर्वाचन हुन नदिन तालाबन्दी गरेका हुन्। पहिले ५६ जना सदस्य रहेको र ५१ जनाले नयाँ सदस्यताको लागि निवेदन दिएको अवस्थामा शुद्धिकरणको नाममा नियम र प्रक्रिया मिचिएको भन्दै उनीहरुले विरोध जनाएका छन्।

पूर्वअध्यक्ष साहले भने, “जबसम्म सदस्यता शुद्धिकरणमा गरिएको विभेद र नयाँ सदस्यताको टुङ्गो लाग्दैन तबसम्म रौतहट शाखाको निर्वाचन हुन सक्दैन।” उनले तोकिएको मितिमा रौतहटमा निर्वाचन नहुने बताएका छन्।

नेपाल पत्रकार महासंघमा नेतृत्व हत्याउन चाहने पक्षले शुद्धिकरणको नाममा निजीकरण गरेको आरोप लगाउँदै पत्रकारहरुले तालाबन्दी जारी राख्ने चेतावनी दिएका छन्। यसले गर्दा रौतहट शाखामा थप विवाद र अवरोध सिर्जना हुने देखिएको छ।

रौतहटका पत्रकारहरुको यस कदमले नेपाल पत्रकार महासंघको नेतृत्वमा शुद्धिकरणको नाममा भइरहेको कार्यप्रति गम्भीर प्रश्न खडा गरेको छ। अबको दिनमा सदस्यता शुद्धिकरण र नयाँ सदस्यताको विषय कसरी समाधान हुन्छ र निर्वाचन कसरी सम्पन्न हुन्छ भन्ने विषयमा सबैको ध्यान केन्द्रित भएको छ।