वीरगन्ज | वीरगन्ज-२ छपकैयास्थित ईदगाह चोकमा पुनर्निर्माण गरिएको पूर्वप्रधानमन्त्री स्व. गिरिजाप्रसाद कोइरालाको शालीकको अनावरण आगामी असार १८ गते गरिने भएको छ।

गत सोमबार वीरगन्जमा बसेको जिपी कोइराला फाउण्डेशनको बैठकले गिरिजाप्रसाद कोइरालाको १०१ औं जन्मजयन्तीको दिन शालीकको अनावरण गर्ने निर्णय गरेको हो। बैठकले शालीक अनावरण कार्यक्रममा नेपाली कांग्रेसका सभापति शेर बहादुर देउवा, वरिष्ठ नेता शशांक कोइराला र महामन्त्री गगन थापालाई बोलाउने निर्णय पनि गरेको छ। फाउण्डेशनका सदस्य मनोहर साहले यसबारे जानकारी दिएका छन्।

असार १८ गते हुने शालीक अनावरण कार्यक्रम भव्यताका साथ सम्पन्न गर्नका लागि विभिन्न समितिहरू गठन गरिएको छ। फाउण्डेशनका मधेस प्रदेश संयोजक महम्मद साहबुद्धिनको संयोजकत्वमा २१ सदस्यीय मूल समिति गठन गरिएको छ। साथै, मञ्च व्यवस्थापन समिति, प्रचार प्रसार समिति, स्वयंसेवक परिचालन तथा सुरक्षा समिति पनि गठन गरिएको साहले बताए।

वीरगन्जमा ९ वर्षपहिले मधेस आन्दोलनका क्रममा आन्दोलनकारीहरूले तोडफोड गरेर भत्काएको पूर्वप्रधानमन्त्री स्व. गिरिजाप्रसाद कोइरालाको शालीक पुनः निर्माण गरेर स्थापना गरिएको हो। वीरगन्ज महानगरपालिका वडा नम्बर २, छपकैयाको ईदगाह चोकमा जिपी कोइराला फाउण्डेशनले स्थापना गरेको नेपाली कांग्रेसका पूर्वसभापति समेत रहेका स्व. कोइरालाको शालीक मधेस आन्दोलनमा २०७२ भदौ १५ गतेका दिन आन्दोलनकारीहरूले तोडफोड गरेर भत्काई दिएका थिए।

त्यही स्थानमा अहिले पुनः स्व. कोइरालाको पूर्ण कदको नयाँ शालीक निर्माण गरी स्थापना गरिएको हो। फाउण्डेशनका मधेस प्रदेश अध्यक्ष महम्मद साहबुद्धिनका अनुसार, मधेस प्रदेश सरकारबाट प्राप्त १६ लाख रुपैयाँ बजेटबाट ईदगाह चोकमा स्व. कोइरालाको पूर्ण कदको नयाँ शालीक निर्माण गरी स्थापना गरिएको हो। प्राप्त कुल १६ लाख रुपैयाँ बजेटमध्ये ११ लाख रुपैयाँ शालीक खरिदमा खर्च गरिएको र बाँकी ५ लाख रुपैयाँ शालीक राखिएको पार्कको मर्मत सम्भार र सौन्दर्यकरणमा खर्च गरिएको जानकारी दिएका छन्।

यो पुनर्निर्माण कार्यले मधेस आन्दोलनका बेला भत्किएको शालीकलाई पुनःस्थापित गर्दै वीरगन्जको इतिहासलाई पुनर्जीवित गर्न मद्दत पुर्याएको छ। गिरिजाप्रसाद कोइरालाको योगदानलाई स्मरण गर्दै यो शालीकले वीरगन्जबासीहरूमा गर्व र सम्मानको भावनालाई जगाउने छ। यस पुनर्निर्माण कार्यले कोइरालाको स्मृतिलाई जोगाई राख्नका लागि महत्वपूर्ण भूमिका निर्वाह गरेको छ।

यो कार्यक्रमले वीरगन्जमा राजनीतिक, सामाजिक र सांस्कृतिक महत्त्वलाई पनि उजागर गर्ने छ। स्थानीय बासिन्दाहरूका लागि यो एक विशेष अवसर हुनेछ जसले इतिहासको एक महत्वपूर्ण पृष्ठलाई पुनर्जीवित गर्दै नयाँ पुस्तालाई प्रेरित गर्नेछ।