वीरगंज | भारतको ओडिशा राज्यमा अत्यधिक गर्मीका कारण ७२ घन्टामा ९९ जनाको मृत्यु भएको छ।

ओडिशाको विशेष राहत आयोगका अनुसार ओडिशामा पछिल्लो केही दिनदेखि ४२ डिग्रीभन्दा माथि तापक्रम मापन गरिएको छ।

आयोगले अधिकांशको मृत्यु लू लागेर भएको छ भने अन्यको कारण खुल्न बाँकी छ।

भारतको बिहारमा पनि गत साता मात्रै २० जनाको लू लागेर मृत्यु भएको थियो। ओडिशामा हालसम्म गर्मीका कारण १४१ जनाको मृत्यु भइसकेको पनि आयोगले जनाएको छ।

यसवर्ष भारतमा अत्यधिक तापक्रम मापन गरिएको छ। भारतको बिहार, झारखण्ड, दिल्ली, ओडिशा, उत्तर प्रदेश र राजस्थान लगायतका स्थानमा ४० देखि ४८ डिग्री तापक्रम मापन गरिएको हो।

मौसम विभागले भने आगामी केही दिन पछि वर्षाको सम्भावना रहेकाले गर्मीबाट राहत हुने बताएको छ। तर, गर्मीको चपेटाबाट जोगिन भने विभागले आग्रह गरेको छ।