वीरगञ्ज । जनकपुरमा पेस्तोल देखाएर सहकारीका एक कर्मचारीबाट ८० लाख रुपैयाँ लुटेको आरोपमा दुई जना पक्राउ परेका छन् ।

पक्राउ पर्नेमा धनुषाकै मिथिला नगरपालिकाका जनक महतो र श्रवण कापर रहेका छन् ।

महतो र कापरको साथबाट केही रकम समेत बरामद गरिएको जिल्ला प्रहरी कार्यालय धनुषाले जनाएको छ । प्रहरीका अनुसार उनीहरूको साथबाट हाल १४ लाख ५३ हजार मात्र बरामद भएको हो ।

गत वैशाख ४ गते धनुषाको सबैला १२ रघुनाथपुरको शुभ श्री बचत तथा ऋण सहकारीका कर्मचारी वीरेन्द्रकुमार महतोलाई मोटरसाइकलमा आएका दुई जना हतियारधारीले जनकपुरधाम १९ मा पेस्तोल देखाएर ८० लाख रुपैयाँ लुटेका थिए । पक्राउ परेका दुवै जनालाई प्रहरी हिरासतमा राखेर थप अनुसन्धान भइरहेको जिल्ला प्रहरी कार्यालय धनुषाले जनाएको छ ।