नवलपुर । नवलपुरको गैडाकोट नगरपालिका –२ भृकुटी चोक अन्तर्गतको पूर्व–पश्चिम राजमार्गमा एम्बुलेन्स, बस र स्कुटर ठोक्किदा तीन जना घाइते भएका छन् । नारायणघाटबाट बर्दिया जाँदैगरेको बा. प्र. ०६०१ ख ०१९६ नम्बरको बसले सोही दिसातर्फ जाँदैगरेको ना ३६ प ९४५ नम्बरको स्कुटरलाई ओभरटेक गर्ने क्रममा विपरित दिसाबाट आइरहेको ग १ च ७१५२ नम्बरको एम्बुलेन्समा ठोक्किदा दुर्घटना भएको नवलपुर प्रहरीले जनाएको छ ।

दुर्घटनामा एम्बुलेन्समा रहेका डाइलासिसका बिरामी मध्यविन्दु नगरपालिका –१२ का ७५ वर्षीय मानबहादुर कुमाल, एम्बुलेन्समा सवार सोही ठाउँका ४५ वर्षीय सोमबहादुर कुमाल र गैडाकोट–६ का स्कुटर चालक ३३ वर्षीय किशोर गौतम घाइते भएको प्रहरी निरीक्षक साजन शर्माले जानकारी दिनुभयो । घाइतेमध्ये विरामी कुमालको अवस्था गम्भीर रहेको र अन्यको सामान्य अवस्थामा भरतपुरको पुरानो मेडिकल कलेजमा उपचार भइरहेको प्रहरी निरीक्षक शर्माले जानकारी दिनुभयो । प्रहरीले तीन वटै सवारी साधनलाई नियन्त्रणमा लिएर अनुसन्धान गरिरहेको जनाएको छ ।