वीरगंज । प्रहरीले धनकुटाको भेडेटारबाट डिजेल तथा पेट्रोल ढुवानी गर्ने ट्याङकरमा लोड गरेको झण्डै ६ सय किलो गाँजा बरामद गरेको छ । प्रहरीले धनकुटाबाट ५ सय ९४ किलो गाँजासहित चार जनालाई पक्राउ गरेको छ । विशेष सूचनाको आधारमा इलाका प्रहरी कार्यालय भेडेटारबाट खटिएको टोलीले बुधबारबिहान धनकुटाको साँगुरीगढी गाउँपालिका–६ भेडेटार चौकमा उक्त गाँजा बरामद गरेको हो । मुलघाटबाट विराटनगरतर्फ आउँदै गरेको को१ख ७३२२ नम्बरको ट्याङकरमा गाँजा लोड भएको पाइएको हो ।

ट्याङकरको तेल लगाउने डिब्बाभित्र गाँजा राखेको अवस्थामा थियो । गाँजा बरामद भएसँगै ओसार–पसारमा संलग्न भारत अररियाका ४४ वर्षीय नईम खान, सह–चालक एम.डि. अफ्रोज, ट्याङकरमा सवार ७० वर्षीय लखन महत्तो र रंगेली नगरपालिका–७ मोरङका ७० वर्षीय गयानन्द मण्डललाई पक्राउ गरेको छ । पक्राउ परेका उनीहरुको बारेमा थप अनुसन्धान भइरहेको प्रहरीले जनाएको छ ।