काठमाडौँ । तेस्रो तथा अन्तिम एकदिवसीय अन्तर्राष्ट्रिय क्रिकेट प्रतियोगितामा सोमबार क्यानडाले दिएको दुई सय ३३ रनको लक्ष्य पछ्याउँदै जवाफी ब्याटिङमा ओर्लिएको नेपालले २० ओभरको खेल सकिँदासम्म एक विकेट गुमाएर एक सय ६ रन बनाएको छ ।

नेपालका लागि ओपनर ब्याट्सम्यान अनिल शाह ५८ र तेस्रो नम्बरका ब्याट्सम्यान भीम सार्की २८ रन बनाउँदै क्रिजमा छन् । नेपाललाई जितका लागि ३० ओभरमा एक सय २७ रन आवश्यक छ । नेपालको हालको रन रेट ५.३० रहेको छ । हालको स्थितिमा जितका लागि नेपाललाई चाहिने रन रेट ४.२३ हो ।

नेपालले पहिलो विकेटका रुपमा ओपनर कुशल भुर्तेललाई गुमाएको थियो । उनी १४ बलमा तीन चौकाको मद्दतले १३ रन बनाउँदै आउट भएका थिए । उनलाई क्यानडाका बलर डिल्लन हेलिगरले बोल्ड गरेका थिए । ४.५ ओभरमा उनी आउट हुँदा नेपालले ४५ रन बनाएको थियो ।