सिरहा । सिरहामा एक नीजि विद्यालयको होस्टेलमा खाना बनाउन गएकी एक बालिकमाथि सोही स्कूलका शिक्षकले बलात्कार गरेको घटना बाहिरिएको छ । सिरहाको विष्णुपुर गाउँपालिका वडा नम्बर १ बजारस्थित रहेको रोज बड बोर्डिङ स्कूलको होस्टेलमा एक बालिकालाई शिक्षकले बलात्कार गरेको घटना बाहिरिएको छ । रोज बोर्डिङ स्कूलको होस्टलमा खाना पकाउने एक महिलाकी १४ वर्षीया छोरीलाई बिहीबार मध्यराति शिक्षक रञ्जित यादवबाट बलात्कृत भएकी हुन् । उनी आमालाई पालो दिन होस्टलमा भात पकाउन गएकी थिइन् । घटनापछि शिक्षक यादव भागेका छन् ।
बालिकाले राति नै आमालाई फोन गरेर घटनाबारे जानकारी गराएकी थिइन् । आज एकाबिहानै उनकी आमा स्कूल पुग्दा शिक्षक यादव फरार भइसकेका थिए ।स्कूलका सञ्चालक सञ्जय यादवले बोर्डिङ र आफूहरूको बेइज्जत हुने भन्दै मिलापत्र गर्न दबाब दिएको बताइएको छ । सञ्चालकको दबाबको बाबजुद पीडितकी दिदीले भनिन्, ‘शिक्षकले ठूलो अपराध गरेका छन् । म न्यायका लागि लड्छु । कसैको दबाबमा पर्दैनौं ।’
पीडित बालिका सामुदायिक विद्यालयको कक्षा ९ मा पढ्छिन् । घरमा कामले फूर्सद् नभएपछि आमाले नै उनलाई स्कूलको होस्टलमा गएर एक दिनका लागि खाना पकाइदिन पठाएकी थिइन् । बलात्कार आरोपी शिक्षक यादव सिरहा नगरपालिका १७ पटेर्वाका छन् । घटनापछि स्कूल सञ्चालकले नै शिक्षकलाई भगाएको बालिकाको आफन्तको आरोप छ ।
