वीरगञ्ज । वीरगञ्ज महानगरपालिका मेयर र उपमेयरका सचिवालय समर्थकहरुबीच कुटाकुट भएको प्रत्यक्षदर्शीले जनाएका छन् ।
महानगरका प्रमुख प्रशासकीय अधिकृत बस्ने कार्यालयको विषयलाई लिएर विवाद उत्पन्न हुँदा मेयर राजेशमान सिंह र उपमेयर इम्तेयाज आलमको सचिवालयका समर्थहरुबीच कुटाकुट भएको प्रत्यक्षदर्शीले बताए ।

प्रमुख प्रशासकीय अधिकृत बस्ने कोठामा ताल्चा लगाएर आफ्नो सचिवालय बनाउने तयारी उपमेयरको सचिवालयले गरेको थियो ।
तर आज अचानक केही वडाअध्यक्षहरुसहितको टोलीले प्रमुख प्रशासकीय अधिकृत त्यो कोठामा लगाइएको ताल्चा फुटाएर पञ्जीकरण शाखाको सामान लैजान लागेका थिए । यही क्रममा विवाद उत्पन्न भएपछि मेयर र उपमेयर सचिवालयका समर्थकबीच कुटाकुट भएको प्रत्यक्षदर्शी बताउँछन् ।
महानगरपालिकामा विवाद चर्किदै गएपछि जिल्ला प्रहरी कार्यालय पर्साबाट डिएसपी कुमारविक्रम थापाको नेतृतवमा प्रहरी परिचलान गरिएको छ ।

उत्पन्न विवाद प्रहरी पुगेपछि साम्य बनेको पर्सा प्रहरीले बताएको छ । पर्सा प्रहरीका प्रवक्ता कुमारविक्रम थापाले अहिले नगरपालिकामा कुनै किसिमको विवाद नरहेको जनाए । उनले भने,‘केही समय अगाडि यहाँ विवाद भएको थियो, त्यहीकारण हामीले प्रहरी परिचालन गरेका हौं । तर अहिले नगरपालिकाको अवस्था सामान्य छ ।’ प्रमुख प्रशासकीय अधिकृत बस्ने कार्यालयमा पञ्जीकरण शाखा राख्न खोजेपछि विवाद सुरु भएको थियो । मेयर सिंह नया भवनमा गएपछि उनी बस्ने पहिलाको कोठामा प्रमुख प्रशासकीय अधिकृत अहिले सरेका छन् ।