वीरगंज | नेपाली कम्युनिस्ट पार्टी (नेकपा) नेता वर्षमान पुनले सरकारलाई संविधान संशोधनमा अगाडि बढ्दा संविधानको मूल मर्मलाई ख्याल गर्न सुझाएका छन् ।
१२ औँ संविधान दिवसका अवसरमा नेसनल लजिस्लेटिभ एकेडेमीले बिहीबार राजधानीमा आयोजना गरेको ‘संविधान कार्यान्वयनको दोस्रो दशक : अवसर र चुनौती’ विषयक कार्यक्रमलाई सम्बोधन गर्दै उनले यस्तो बताएका हुन् ।
‘अहिलेको संविधान ठूलो त्याग र तपश्या बलिदानबाट आएको हो । यसलाई नकार्ने काम भयो भने फेरि अर्को द्वन्द्व हुन्छ । पावर ब्यालेन्स बिग्रन्छ’, नेता पुनले भने, ‘संविधानका गणतन्त्र, संघीयता, धर्मनिरपेक्षता, समावेशिता, जस्ता फाउन्डेसनहरू जो छन्, यस्ता फाउन्डेसनमै हान्ने वा पुनर्लेखनतिर जाँदा अर्को द्वन्द्वतिर जान्छ कि भन्ने मेरो आफ्नो धारणा छ ।’
संविधानप्रतिको प्रतिबद्धता स्पष्ट गर्न सत्तारुढ रास्वपालाई उनको आग्रह छ । आममानिसले रास्वपाबाट संविधानप्रतिको स्पष्ट प्रतिबद्धता खोजेको उनको भनाइ थियो ।
पुनले संविधान निर्माण प्रक्रियामा प्रत्यक्ष भूमिका नखेलेका नयाँ राजनीतिक शक्तिहरू राज्य सञ्चालनको केन्द्रमा पुगेपछि उनीहरूको संविधानप्रतिको प्रतिबद्धतामाथि चासो हुनु स्वाभाविक भएको बताए ।
संशोधनको नाममा पुनर्लेखन गर्न खोजिएको शंका भएपछि संविधान संशोधन बहस कार्यदलमा रास्वपाबाहेक दल सहभागी नभएको पनि पुनले स्मरण गरे ।
नेता पुनले प्रधानमन्त्री बालेन्द्र शाह (बालेन) का सल्लाहकार असिम शाह नेतृत्वको कार्यदल रास्वपा एक्लैको रहेको टिप्पणी गरे ।
कार्यदलले संविधानका अधिकांश धारामा संशोधन गर्ने गरी प्रतिवेदन दिएको र त्यसो गरिए संशोधन नभई पुनर्लेखन हुने तर्क पुनले गरे ।
पुनले संविधान लामो संघर्ष, त्याग र बलिदानबाट निर्माण भएको भन्दै त्यसको मूल संरचना नै अस्वीकार गर्ने प्रयासले अर्को द्वन्द्व निम्त्याउन सक्ने चेतावनी दिएका हुन् ।
संविधानले विभिन्न शक्ति र संस्थाबीच कायम गरेको सन्तुलनलाई समयअनुसार परिमार्जन गर्दै लैजान भने सकिने पनि पुनले बताए ।
नयाँ शक्तिलाई पनि त्यही संरचनाभित्र समेट्दै शक्ति सन्तुलन कायम गर्नु संविधानलाई टिकाउ बनाउने बाटो भएको उनको भनाइ छ ।
संविधानको निर्माण र त्यसका लागि भएका संघर्ष तथा बलिदानको पृष्ठभूमि बुझेर र त्यसलाई स्वीकार गरेर अघि बढ्न रास्वपालाई पुनले आग्रह गरे ।
