वीरगंज । अन्तर्राष्ट्रिय बालिका दिवसको अवसर कक्षा ९ मा अध्ययनरत एक छात्रा एक दिनका लागि मधेस प्रदेशको शिक्षा तथा संस्कृतिमन्त्री बनेकी छन्। शिक्षा तथा संस्कृतिमन्त्री महेशप्रसाद यादवले एक दिनका लागि धनुषाकाे जनकनन्दनी गाउँपालिकामा रहेको विद्यालयको कक्षा ९ मा अध्ययनरत फरक क्षमता (अपांग) भएकी १८ वर्षीया रजिना खातुनलाई पद तथा मन्त्रीको जिम्मेवारी हस्तान्तरण गरेका हुन्। मन्त्री यादवले बालिकाको मनोबल उच्च बनाउन पछाडि परेका मुस्लिम समुदायकाका किशोरीलाई प्रतिकात्मक रूपमा आफ्नो मन्त्रीको पद तथा कुर्सी हस्तान्तरण गरेका हुन्।

अन्तर्राष्ट्रिय बालिका दिवसको अवसर पारेर प्लान इन्टरनेसन नेपालले विकासको कामसहित बालिका, किशोरी तथा महिलाको सशक्तिकरण गर्ने अभियानअन्तर्गत विभिन्न पदहरूमा बालिकाहरुलाई पदासीन गराएर उनीहरूको आत्मबललाई बलियो बनाउने प्रयास गरिरहेको छ। एक दिनका लागि मन्त्रीको पद पाएकी किशोरी खातुनले सार्वजनिक विद्यालयमा भएका समस्या तथा समाधानको विषयमा मन्त्री यादवलाई जानकारी दिँदै समाधानका लागि प्रयास गर्नका लागि आग्रह गरिन्। कार्यक्रममा बोल्दै मन्त्री यादवले मधेस प्रदेश शिक्षा र साक्षरताको दृष्टिकोणले निक्कै पछाडि परेकाले नै प्रदेश सरकारले साक्षर प्रदेश अभियान चलाउन लागेको बताए।

उनले प्रदेशको शिक्षाको सुधारका लागि यसै महिनामा संघीय सरकार, स्थानीय सरकारको प्रमुख, उपप्रमुख, शिक्षा शाखा प्रमुख, विद्यार्थी संगठन तथा शिक्षक संगठनका प्रतिनिधिहरू राखेर बृहत अन्तरक्रिया गर्न लागेको र त्यसपछि प्रदेश सरकारले शिक्षा सुधारको अभियान चलाउने बताए। प्लान इन्टरनेसन नेपाल मधेस प्रदेशका प्रमुख रविशंकर पण्डितले बालिका, किशोरी तथा महिलालाई सशक्त बनाउनका लागि यस्ता प्रकारको अभियान चलाउँदै आएको बताउँदै सन् २०२२ मा १०७ जना र २०२३ मा हालसम्म ५० जनालाई विभिन्न पदहरू पदासीन गराएर उनीहरूको मनोबल बढाउने प्रयास भएको बताए।