वीरगंज । मोटरसाइकल चोरलाई पक्राउ गर्ने क्रममा दुर्घटना हुँदा प्रहरी जवानको मृत्यु भएको छ । मृत्यु हुनेमा जिल्ला कञ्चनपुर भीमदत्त नगरपालिका–११ घर भई इलाका प्रहरी कार्यालय निजगढ बारामा कार्यरत प्रहरी जवान आकाश सुनार रहेको प्रहरी उपरीक्षक (एसपी) सुरेश प्रसाद काफ्लेले जानकारी दिए ।

शनिवार बिहान साढे ७ बजेको समयमा निजगढ नगरपालिकाबाट वडा नम्बर ८ बाट जीतपुरसिमरा उपमहानगरपालिका–१६ काँठगाटतर्फ मोटरसाइकल चोरी गरी लैजाँदै गरेको गोप्य सूचनाका आधारमा चोरलाई खोजतलास गर्दै जाने मोटरसाइकल दुर्घटनामा परेर सुनारको मृत्यु भएको एसपी काफ्लेले बताए ।

सुनारले चलाएको ज १२ प ७१५४ नम्बरको मोटरसाइकल अनियन्त्रित भई दुर्घटना हुँदा उनको टाउको, अनुहार र शरीरका विभिन्न भागमा गम्भीर चोटपटक लागेको थियो । दुर्घटना लगतै उनलाई प्रादेशिक अस्पताल कलैयामा भर्ना गराइएको थियो ।यद्यपि त्यहाँ उपचार सम्भव नभएपछि उनलाई थप उपचारका लागि परवानीपुरस्थित एलएस न्यूरो अस्पतालमा लागिएको थियो । त्यहाँ उनको उपचारका क्रममा दिउँसो सवा १२ बजेको करिबमा मृत्यु भएको काफ्लेले बताए ।