वीरगञ्ज । जेन जि पर्साका संयोजक बिशेष साहको नेतृत्वमा जेन जि पर्साको टोलीले जिल्ला प्रहरी कार्यालय, पर्साका प्रमुख पवन भट्टराई ज्युसँग भेटघाट गरी विभिन्न समसामयिक तथा जनसरोकारका विषयमा महत्वपूर्ण छलफल गरेको छ।

भेटघाटका क्रममा साइबर अपराधसम्बन्धी जनचेतना अभिवृद्धि, कानून तथा शान्ति–सुरक्षालाई थप प्रभावकारी र कडाइका साथ कार्यान्वयन गर्ने, प्रहरी र आम नागरिकबीचको सम्बन्धलाई अझ सुमधुर तथा विश्वासिलो बनाउने विषयमा छलफल भएको थियो। साथै वीरगञ्जसहित समग्र मधेश प्रदेशकै गम्भीर समस्याका रूपमा रहेको लागुऔषध दुर्व्यसन तथा यसको नियन्त्रणका विषयमा समेत जेन जि पर्साको टोलीले आफ्ना धारणा तथा सुझाव प्रस्तुत गरेको थियो।

छलफलका क्रममा जिल्ला प्रहरी कार्यालय, पर्साका प्रमुख पवन भट्टराई ज्युले सम्बन्धित विषयमा आवश्यक समन्वय, सहकार्य तथा प्रभावकारी पहल गर्ने प्रतिबद्धता व्यक्त गर्नुभएको थियो। नागरिक र प्रहरीबीचको सहकार्यलाई थप मजबुत बनाउँदै सुरक्षित, सभ्य तथा अपराधमुक्त समाज निर्माणमा युवाहरूको भूमिका महत्वपूर्ण हुने विषयमा समेत जोड दिइएको थियो।

उक्त छलफलमा लालबाबु यादव, रवि चौरसिया, सागर सहनी, शिव पटेल, सुशील पटेल, सुकेश पटेल लगायत जेन जि पर्साका सदस्य तथा युवाहरूको सहभागिता रहेको थियो।