वीरगंज | अभिलाष गुप्ता
रक्सौल साउन १६

गुरु पूर्णिमाको अवसरमा भारतको सीमावर्ती सहर रक्सौलमा आयोजित तीनदिने धर्म संसद धार्मिक तथा भक्तिमय वातावरणबीच सम्पन्न भएको छ। कार्यक्रममा भारत र नेपालका विभिन्न सन्त–महात्मा, अखाडाका प्रतिनिधि तथा हजारौँ श्रद्धालुको उल्लेखनीय सहभागिता रहेको थियो।

धर्म संसदमा सनातन धर्मको संरक्षण, गौसंरक्षण, धार्मिक एकता तथा सांस्कृतिक संरक्षणसँग सम्बन्धित विभिन्न प्रस्ताव सर्वसम्मत रूपमा पारित गरिएको आयोजकले जनाएको छ।

धर्म संसदका संयोजक जगतगुरु वामाचार्य सेवक संजयनाथजी महाराजले धर्म संसदको उद्देश्य समाजलाई सनातन संस्कृति, आध्यात्मिक मूल्य र राष्ट्रसेवाप्रति जागरूक गराउनु रहेको बताउनुभयो। उहाँले भारत र नेपालका सन्तहरूको ऐतिहासिक संगमले धार्मिक एकता, सामाजिक सद्भाव तथा मानव कल्याणको सशक्त सन्देश दिएको उल्लेख गर्दै धर्म, संस्कृति र नैतिक मूल्यहरूको संरक्षणका लागि सबैले संगठित भएर कार्य गर्नुपर्ने आवश्यकता औँल्याउनुभयो।

काली सेनाकी राष्ट्रिय प्रमुख पार्वती तिवारीले धर्म संसद केवल धार्मिक कार्यक्रम मात्र नभई सनातन संस्कृति, सामाजिक समरसता तथा भारतीय परम्पराको संरक्षणका लागि प्रभावकारी मञ्च भएको बताउनुभयो। उहाँले धर्म संसदबाट पारित प्रस्तावहरू सन्तहरूको सामूहिक चिन्तन र संकल्पको प्रतिफल भएको उल्लेख गर्दै गौसंरक्षण, सांस्कृतिक चेतना तथा राष्ट्रहितसँग सम्बन्धित विषयमा शान्तिपूर्ण र संवैधानिक संवादलाई निरन्तर अगाडि बढाउनुपर्नेमा जोड दिनुभयो।

धर्म संसदबाट भारतलाई हिन्दु राष्ट्र घोषणा गर्न, गौमातालाई ‘राष्ट्रमाता’को संवैधानिक मान्यता प्रदान गर्न, सनातन संस्कृति तथा भारतीय परम्पराको संरक्षण र प्रवर्द्धन गर्न तथा समाजमा धार्मिक चेतना अभिवृद्धि गर्दै संगठनात्मक एकतालाई सुदृढ बनाउन आह्वान गर्ने प्रस्ताव पारित गरिएको छ।

यसैगरी, जम्मु–कश्मीरबाट धारा ३७० हटाइएको तथा अयोध्यामा श्रीराम मन्दिर निर्माण सम्पन्न गराएकोमा भारत सरकारप्रति धन्यवाद प्रस्ताव पारित गरिएको छ। साथै बिहार सरकारसँग गुरुनाथ अखाडालाई आवश्यक सरकारी सुविधा उपलब्ध गराउन आग्रह गरिएको छ।

धर्म संसदमा अखाडाको परम्पराअनुसार विभिन्न सन्तहरूलाई नयाँ जिम्मेवारीसमेत प्रदान गरिएको छ। नेपालका रामसुरत नाथलाई मण्डलेश्वर, अल्टर बाबालाई भारतको सभापति, बुद्धनाथलाई महामन्त्री, नेपालका कलैया निवासी नागा बाबालाई सेनापति प्रमुख तथा गुरुनाथ भोलानाथलाई अखाडाको महन्त नियुक्त गरिएको जनाइएको छ।

तीन दिनसम्म सञ्चालन भएको धर्म संसदको सञ्चालन जगतगुरु वामाचार्य सेवक संजयनाथजी महाराजले गर्नुभएको थियो। कार्यक्रममा सहभागी भारत र नेपालका सन्त–महात्माहरूले सनातन धर्मको संरक्षण, सामाजिक सद्भाव, आपसी भाइचारा तथा राष्ट्रहितका पक्षमा संयुक्त रूपमा कार्य गर्ने प्रतिबद्धता व्यक्त गरेका थिए। धर्म संसदमा ठूलो सङ्ख्यामा श्रद्धालु, धर्मगुरु तथा सन्त–महात्माहरूको उत्साहजनक सहभागिता रहेको थियो।