वीरगंज । जनकपुरधाममा हतियारसहित एकजना बालिका पक्राउ परेकी छिन् । आज साझ ७ बजेर ४० मिनेटमा सशस्त्र प्रहरी बलले १६ बर्षिया एकजना बालिकालाई पक्राउ गरेको छ । जनकपुरधाम रेल्वे स्टेशन नजिक रगेको हनुमान मन्दिरको प्रांगणबाट भारत जिल्ला लख्खि शेराई ग्रामपत्र्चायत बडीपोखरी वडा नं.९ बस्ने पप्पु सहनीको छोरी अन्दाजी वर्ष १६ की पुजा कुमारी सहनीलाई सशस्त्र प्रहरीले नियन्त्रणमा लिएको सशस्त्र प्रहरी बल नम्बर ८ गणका प्रहरी उपरीक्षक दिनेश मल्लले जानकारी दिएको छ ।

रेल्वे स्टेशनबाट सहायक प्रहरी नायब उपरीक्षक खडक बहादुर शाहीको कमाण्डमा खटिएको ५ जनाको डिउटी टोलीले विशेष सूचनाको आधारमा चेकजाँच गर्दा उनलाई पक्राउ गरिएको प्रहरीले जनाएको छ । बालिका सहनीलाई चेकजाँच गर्दा उनको साथबाट १ थान कटुवा पेस्तोल, नेपाली ६५ रुपैया, १ थान भारतीय छन् सिम र १ थान चाँदीको जस्तो देखिने मालाको लकेट बरामद गरेको प्रहरीले जनाएको छ ।

नियन्त्रणमा लिएको रेल्वे सुरक्षा बेश जनकपुरधामले ती बालिकालाई थप आवश्यक कार्यवाहीको लागि जिल्ला प्रहरी कार्यालय धनुषालाई बुझाउने तयारी गरिरहेको प्रहरी उपरीक्षक मल्लले जनाए । उनका अनुसार ती बालिका दुईदिन अघि भारतबाट रेल चढेर नेपाल आएको र सोही मन्दिरमा बसिरहेको थियो । प्रहरीको प्रारम्भिक अनुसन्धान अनुसार बालिकालाई नेपाल ल्याएर समान्य व्यापारीहरुलाई धम्काउने कार्यमा प्रयोग गर्न कसैले ल्याइएको बुझिएको छ । उनी नेपाल एक्लै आएको समेत बुझिएको छ ।