विराटनगर: मोरङको धनपालथान गाउँपालिका-२ बाट कटुवा पेस्तोलसहित ३ जनालाई प्रहरीले पक्राउ गरेको छ।

कोशी प्रदेश प्रहरी कार्यालय विराटनगरको चाडपर्व सुरक्षा विशेष कार्ययोजनाअनुसार प्रहरी चौकी अमाहीबरियातीबाट शुक्रबार राति साढे ९ बजे खटिएको गस्ती टोलीले धनपालथान-२ स्थित भित्री सडक खण्डमा सडक छेउमा रोकिराखेको बिआर ०६ पिए १३६२ नम्बरको स्करपियो चेकजाँच गर्दा उक्त गाडीको ड्यासबोर्ड भित्र लुकाई राखेको कटुवा पेस्टोल १ थान र ३ राउण्ड गोलीसमेत फेला पारेको हो।

गाडीमा गोली सहित कटुवा पेस्तोल फेला परेसँगै गाडी चालक सर्लाही हरीपुर्वा-७ का २७ वर्षीय रवीन्द्रकुमार यादव, गाडीमा सवार रहेका सर्लाही हरीपुर्वा-७ का २० वर्षीय कमलेशकुमार यादव र महोत्तरी गौशाला-६ का २२ वर्षीय राम दयाल यादव समेतलाई पक्राउ गरिएको प्रहरीले जनाएको छ।

पक्राउ परेका तीनै जनालाई इलाका प्रहरी कार्यालय रंगेलीकाे हिरासतमा राखेर थप अनुसन्धान भइरहेको प्रहरीले जनाएको छ।साभार:अन्नपूर्ण पाेष्ट