वीरगंज । वीरगन्ज महानगरपालिकाका मेयर राजेशमान सिंहले मंगलबार नेपाल खानेपानी संस्थानका अध्यक्षसहितको टोलीलाई वीरगन्जमै बोलाएर यहाँको अवस्थाबारे जानकारी गराएका छन् । वीरगन्जस्थित संस्थानकाे शाखा कार्यालयमा कर्मचारी अभाव रहँदा महानगरले लिएको लक्ष्य अनुरुप सार्वजनिक स्थानमा पानीको धारा जडान गर्न समय लागेको गसनासाे आएपछि मेयर सिंहले तत्काल समस्या समाधान हुने गरी कर्मचारी थप गर्न संस्थानका अध्यक्षसंग आग्रहपनि गरे गर्नुभएको । जस अनुरुप ६ जना मात्रै प्लम्बर रहेको संस्थानको वीरगन्ज कार्यालयमा अब १६ जना प्लम्बर थप गरेर धारा जडानको कामलाई तिब्रता दिन लगाएको संस्थानका अध्यक्ष गुणाकर भुषालले बताए ।

संस्थानले सार्वजनिक स्थानमा धारा जडान गर्ने कामलाई तिब्रता दिए पानीको हाहाकारबाट गुज्रिरहेका यहाँका नागरिकले राहत अनुभुति गर्ने विश्वास मेयर सिंहले लिए ।सार्वजनिक धारा जडानका लागि महानगरले प्राविधिकको ४ वटा छुट्टा छुट्टै टोली नै खटाएको छ । महानगरको टोलीसँगै एक जना संस्थानको कर्मचारी पनि अनिवार्य हुनु पर्ने भएकाले संस्थानले आफ्नो कर्मचारी दिन नसक्दा महानगरबाट खटिएको टोलीले लक्ष्य अनुरुप काम गर्न सकेको छैन ।जनशक्ति थपिएसँगै अब लक्ष्य अनुरुप काम हुने संस्थान वीरगन्ज शाखा कार्यालयका प्रमुख निरण महर्जन बताए। संस्थानले अहिले सार्वजनिक स्थानमा धारा जडान गर्ने कामलाई प्राथमिकतामा राखेर काम गरिरहेको भन्दै उनले व्यक्तिगत धारा जडानको मागलाई पनि सम्बोधन गर्न काम गरिरहेको बताए ।

मंगलबार भएको छलफलमा खानेपानी संस्थानले धारा जडान गर्न पाइप विच्छ्याउँदा महानगर क्षेत्रमा खनेको सडक र सडक पेटी यथासिघ्र छिटो मर्मत गरिदिने प्रतिबद्धता समेत जनाएको छ । महानगरका मेयर सिंहको कार्यकक्षमा भएको छलफलमा संस्थानका अध्यक्ष गुणाकर भुषाल, महानगरका प्रमुख प्रशासकीय अधिकृत लक्ष्मी प्रसाद पौडेल, खानेपानी संस्थानका संचालक वासुदेव अर्याल, निरु दर्लामी कुँवर, महाप्रबन्धक इश्वर प्रसाद, संस्थानका वीरगन्ज कार्यालय प्रमुख निरण महर्जन, प्रविण कुमार साह, मेयरका प्रेस सल्लाहकार महेश दास लगायतको उपस्थिति रहेको थियो ।