बारा । सिकिन्द्र साह । बारा जिल्लाको सिम्रौनगढ नगरपालिकामा सञ्चालन हुँदै आएको कन्काली माइ मनी ट्रान्सफरबाट ग्राहकले पठाएको तथा प्राप्त गर्नुपर्ने रकम हिनामिना गरी सञ्चालक फरार भएको आरोप लागेको छ। घटनामा संलग्न रहेको आरोपमा प्रहरीले दुई जनालाई पक्राउ गरी अनुसन्धान अघि बढाएको छ।

रौतहटको माधवनारायण नगरपालिका–८, राजवडा निवासी २८ वर्षीय रञ्जय कुमार साहले सिम्रौनगढ क्षेत्रमा उक्त मनी ट्रान्सफर सञ्चालन गर्दै आएका थिए। ग्राहकहरूले विदेशमा रहेका आफन्तले पठाएको रकम मनी ट्रान्सफरमार्फत रिसिभ भइसके पनि आफूहरूले भने रकम प्राप्त गर्न नसकेको आरोप लगाएका छन्।

पीडितहरूका अनुसार नयाँ टोल निवासी सलिता देवी सहनीका श्रीमानले दुबईबाट पठाएको रकमसमेत मनी ट्रान्सफरबाट रिसिभ गरिएको थियो। त्यसैगरी कनकपुर निवासी रमनी देवी तथा ओमानबाट सीता देवीका पति रम्भु रामले पठाएको रकमसमेत सम्बन्धित सेवाग्राहीलाई उपलब्ध नगराइएको आरोप छ।

पीडितहरूले हिनामिना भएको रकम करिब ३० लाख रुपैयाँभन्दा बढी रहेको दाबी गरेका छन्। उनीहरूका अनुसार सुरुमा सञ्चालकले आज भुक्तानी भएको रकम भोलि उपलब्ध गराउने भन्दै आश्वासन दिने गरेका थिए। तर पछि मनी ट्रान्सफरको काउन्टर बन्द गरी सञ्चालक फरार भएको उनीहरूको भनाइ छ।

घटनाबारे स्थानीय उमा देवी र लिलावती देवीले इलाका प्रहरी कार्यालय सिम्रौनगढमा जानकारी गराएपछि प्रहरीले सिम्रौनगढ नगरपालिका–हरिहर निवासी विवेक कुशवाहा र सानो इटवाल निवासी महमद आलमलाई पक्राउ गरेको जनाएको छ।

क्यास काउन्टरमा बस्ने इटवाल निवासी नुराज अन्सारी भने फरार रहेको प्रहरीले जनाएको छ। पक्राउ परेकाहरूलाई नियन्त्रणमा लिएर घटनाबारे थप अनुसन्धान भइरहेको इलाका प्रहरी कार्यालय सिम्रौनगढले जनाएको छ।

मुख्य आरोपित भनिएका रञ्जय कुमार साहको खोजी भइरहेको प्रहरीले जनाएको छ।

विदेशमा रहेका नेपालीहरूले पठाएको रेमिट्यान्स रकम परिवारको दैनिक आवश्यकता तथा आर्थिक व्यवस्थापनको महत्वपूर्ण आधार हुने भएकाले सेवाग्राहीले रकम प्राप्त गर्न नसकेको आरोप गम्भीर विषय बनेको छ। घटनाको निष्पक्ष अनुसन्धान गरी दोषी देखिने व्यक्तिमाथि प्रचलित कानुनअनुसार कारबाही तथा पीडितको रकम फिर्ताका लागि आवश्यक पहल गर्नुपर्ने माग पीडितहरूले गरेका छन्।