वीरगंज | मकवानपुरको बकैया गाउँपालिका वडा नं. १२ स्थित धारापानीमा एक जना मृत अवस्थामा फेला परेका छन् ।  ३५ वर्षीय राज कुमार खत्री आफ्नै घरमा सुत्ने कोठामा मृत अवस्थामा फेला परेको जिल्ला प्रहरी कार्यालय मकवानपुरले जनाएको छ ।

खत्रीलाई मृत फेला पारेसँगै पाँच जनालाई अनुसन्धानका लागि लागि नियन्त्रणमा लिइएको जिल्ला प्रहरी कार्यालय, मकवानपुरका प्रहरी नायव उपरीक्षक माधव काफ्लेले जानकारी दिनुभयो । गत शुक्रबार दिउँसो खत्री मृत अवस्थामा रहेको खबरपछि इलाका प्रहरी कार्यालय ठिंगन मकवानपुरबाट प्रहरी निरीक्षक सुशान्त मिश्र नेतृत्वको प्रहरी टोलीले घटनास्थल सुरक्षित राखेको थियो ।

थप अनुसन्धानको लागि जिल्ला प्रहरी कार्यालय मकवानपुरका प्रहरी उपरीक्षक श्याम बहादुर खत्रीको नेतत्वमा प्रहरी टोली र बागमती प्रदेश प्रहरी कार्यालय हेटौँडाबाट कुकुरसहितको टोलीले प्रारम्भिक घटनास्थल मुचुल्का पश्चात् शव परीक्षणका हेटाँैडा अस्पताल ल्याएको थियो ।

प्रहरी नायव उपरीक्षक काफ्लेले ज्यान सम्बन्धी कसुरमा अनुसन्धानका लागि बकैया गाउँपालिका वडा नं. १२ का ३५ वर्षीया मृतककी श्रीमती सलिना घले, मृतकका आमा ६० वर्षीया गोमा खत्री, मृतकका भाइ ३३ वर्षीय दिनेश खत्री, ४५ वर्षीय अमर खत्री र ४५ वर्षीय राजेन्द्र घलेलाई नियन्त्रणमा लिएको बताउनुभयो ।

शव हेटौँडा अस्पतालमा परीक्षणपछि मृतकको दिदी सजिना खत्रीले बुझिलगेको प्रहरीको भनाइ छ ।