वीरगंज | टाटा मोटर्सको नयाँ पिकअप सवारीसाधन ‘टाटा योद्धा २.० बीएस–६’ को वीरगञ्जमा शुभारम्भ गरिएको छ। टाटा मोटर्सका लागि नेपालमा आधिकारिक वितरक सिप्रदी ट्रेडिङ प्रालिले बिहीबार वीरगञ्जमा एक कार्यक्रम आयोजना गरी नयाँ मोडलको शुभारम्भ गरेको हो।

कार्यक्रममा वीरगञ्ज उद्योग वाणिज्य संघका अध्यक्ष हरि गौतम प्रमुख अतिथिका रूपमा उपस्थित थिए। विशिष्ट अतिथिमा सुरज फिस सप्लायर्सका सञ्चालक एवं सञ्चारकर्मी अजय साह, ओम्नी फाइनान्सका महाप्रबन्धक बासु तिमलसिना लगायतको उपस्थिति रहेको थियो।

कार्यक्रमको अध्यक्षता सिप्रदी ट्रेडिङ प्रालिको कमर्सियल भेहिकल बिजनेस युनिटका बिक्री प्रमुख कृष्णचन्द्रले गरेका थिए। कार्यक्रममा प्रमुख प्रबन्धक रामेश्वर घिमिरे, पिकअप उत्पादन व्यवस्थापक सञ्जय तामाङ तथा वीरगञ्ज शाखा प्रमुख एवं प्रमुख प्रबन्धक सन्दीप गुप्ता कानु लगायतको सहभागिता रहेको थियो।

सिप्रदी ट्रेडिङ प्रालिका पिकअप उत्पादन व्यवस्थापक सञ्जय तामाङका अनुसार टाटा योद्धा २.० बीएस–६ मा नयाँ २.२ लिटर अर्थात् २ हजार १७९ सीसी बीएस–६ इन्जिन जडान गरिएको छ। यसले १०० हर्सपावर शक्ति तथा २५० एनएम टर्क उत्पादन गर्ने कम्पनीले जनाएको छ।

नयाँ योद्धामा २ टनसम्म भारवहन क्षमता, उन्नत तथा भरपर्दो गियरबक्स, बलियो च्यासिस र निर्माण गरिएको वातानुकूलित प्रणाली रहेको छ। सवारीसाधनमा आवश्यकता अनुसार सञ्चालन गर्न सकिने इको र नर्मल मोडसहितको बहु–ड्राइभ प्रणाली समेत उपलब्ध रहेको जनाइएको छ।

त्यस्तै, एसयूभी शैलीको आधुनिक बाहिरी डिजाइनसँगै पछाडिको पार्किङ सेन्सर जडान गरिएको छ। सामान बोक्नका लागि ८.९ फिट लम्बाइ र ६ फिट चौडाइको भारवहन भाग उपलब्ध रहेको कम्पनीले जनाएको छ।

टाटा योद्धा २.० बीएस–६ विशेषगरी अन्तरसहर सामान ढुवानीका लागि उपयोगी हुने बताइएको छ। फलफूल तथा तरकारी, पशुचौपाया, माछा, दैनिक उपभोग्य वस्तु, हार्डवेयर सामग्री तथा बजारमा आवश्यक विभिन्न सामानको ढुवानीका लागि यो सवारी उपयुक्त हुने कम्पनीको दाबी छ।

कार्यक्रममा नयाँ टाटा योद्धाको विशेषता, प्राविधिक क्षमता तथा व्यावसायिक प्रयोजनबारे जानकारी दिइएको थियो। टाटा मोटर्सले नयाँ योद्धालाई ‘टाटा योद्धा नेभर स्टप्स’ अर्थात् निरन्तर अघि बढ्ने क्षमताको पिकअपका रूपमा प्रस्तुत गरेको छ।

वीरगञ्जमा आयोजित शुभारम्भ कार्यक्रममार्फत टाटा मोटर्सले व्यावसायिक सवारीसाधनको बजारमा नयाँ प्रविधि र उच्च भारवहन क्षमतासहितको योद्धा २.० बीएस–६ उपलब्ध गराएको हो।