बारा । सिकिन्द्र साह । आदर्श कोतवाल गाउँपालिकामा अपाङ्गता भएका महिलाको हकअधिकार संरक्षण गर्दै उनीहरूको शिक्षा, स्वास्थ्य तथा रोजगारीमा समान पहुँच सुनिश्चित गर्न माग गर्दै गाउँपालिकालाई खबरदारी पत्र बुझाइएको छ।
मिथिला सारथि समाज नेपालका कार्यकारी निर्देशक सुनिलकुमार यादव, अध्यक्ष प्रतिमा देवी महतो लगायतको सहभागितामा UN Women को आर्थिक सहयोगमा सञ्चालित ‘हाम्रो साहस’ परियोजनाअन्तर्गत उक्त खबरदारी पत्र बुझाइएको हो।
अपाङ्गता महिला सञ्जाल तथा पारालिगल प्रतिनिधिहरूको सहभागितामा गाउँपालिकाका निमित्त प्रमुख प्रशासकीय अधिकृत पारस राय यादवलाई पत्र हस्तान्तरण गरिएको थियो।
खबरदारी पत्रमार्फत अपाङ्गता भएका महिलाका लागि शिक्षा, स्वास्थ्य र रोजगारीमा सहज तथा समान पहुँच सुनिश्चित गर्नुपर्ने, गाउँपालिकाभित्रका सार्वजनिक तथा भौतिक संरचनालाई अपाङ्गतामैत्री बनाउनुपर्ने लगायतका माग अघि सारिएको छ।
त्यस्तै, आदर्श कोतवाल गाउँपालिकामा विगतमा सञ्चालनमा रहेको बीपी नेत्र प्रतिष्ठानसँग सम्बन्धित आँखा, कान तथा घाँटी उपचार एवं पुनःस्थापना सेवा पुनः सञ्चालन गर्न माग गरिएको छ।
यसैगरी, ३ देखि १४ वर्ष उमेर समूहका दृष्टिविहीन, बहिरा तथा बौद्धिक अपाङ्गता भएका बालबालिकालाई प्रदान गरिँदै आएको सेवा विगत तीन वर्षदेखि बन्द रहेको भन्दै उक्त सेवा तत्काल पुनः सञ्चालन गर्न समेत माग गरिएको छ।
अपाङ्गता भएका महिला तथा बालबालिकाको अधिकार सुनिश्चित गर्न स्थानीय सरकारले नीति, बजेट तथा कार्यक्रममार्फत प्रभावकारी पहल गर्नुपर्नेमा सहभागीहरूले जोड दिएका छन्।
