बारा ।सिकिन्द्र साह | बारा जिल्लाको सिम्रौनगढ नगरपालिका–१०, देवापुर टेटाका सरसफाइ कर्मचारी गिरि मलि डोम एक वर्षदेखि पारिश्रमिक नपाएपछि आर्थिक समस्यामा परेका छन्। आफूले लामो समयसम्म काम गरे पनि पारिश्रमिकका लागि पटक–पटक नगरपालिका धाउँदा समेत सुनुवाइ नभएको उनको गुनासो छ।

मलिका अनुसार उनी करार सेवामा नियुक्त भई वडा क्षेत्रमा सरसफाइ गर्ने, नाला तथा सार्वजनिक चर्पी सफा गर्ने जिम्मेवारीमा कार्यरत थिए। सुरुवाती समयमा नियमित रूपमा पारिश्रमिक पाए पनि पछिल्लो एक वर्षदेखि आफ्नो तलब रोकिएको उनले बताए।

“नगर प्रमुख किशोरी साह कलवारको निर्देशनमा मेरो एक वर्षको पारिश्रमिक रोकिएको हो,” मलिले भने, “पटक–पटक गुहार माग्दा पनि सुनुवाइ भएन। घरमा स–साना बालबालिका छन्। पारिश्रमिक नपाउँदा दैनिक गुजारा चलाउन समेत कठिन भएको छ।”

आफू महादलित समुदायबाट भएकै कारण समस्याप्रति सम्बन्धित निकायले गम्भीरता नदेखाएको मलिको आरोप छ। नगरपालिकामा आफूजस्तै काम गर्ने केही डोम समुदायका कर्मचारी अझै कार्यरत रहेको उनको दाबी छ।

यता, नगर प्रमुख किशोरी साह कलवारले भने नगरपालिकाले नियमअनुसार ११७ जना कर्मचारीलाई हटाएको बताएका छन्। कर्मचारी हटाउने प्रक्रिया कानुन र नगरपालिकाको नियमअनुसार नै भएको उनको दाबी छ।

पारिश्रमिक रोकिएको विषयमा कर्मचारी र नगरपालिकाबाट फरक–फरक दाबी सार्वजनिक भएपछि घटनाको निष्पक्ष छानबिन आवश्यक देखिएको छ। लामो समय काम गरेका कर्मचारीको पारिश्रमिक रोकिएको भए त्यसको कानुनी तथा प्रशासनिक आधारसमेत सार्वजनिक गर्नुपर्ने स्थानीयको माग छ।

श्रम गरेबापतको पारिश्रमिक नपाउनु गम्भीर विषय भएको भन्दै स्थानीयले सम्बन्धित निकायलाई तत्काल पहल गरी समस्याको समाधान गर्न माग गरेका छन्। विशेषगरी विपन्न तथा महादलित समुदायका श्रमिकले आफ्नो श्रमको पारिश्रमिकका लागि लामो समयसम्म भौतारिनुपर्ने अवस्था अन्त्य गर्नुपर्ने उनीहरूको भनाइ छ।