वीरगंज | अन्तर्राष्ट्रिय युवा दिवस–२०२६ को अवसरमा नेपाल रेडक्रस सोसाइटी पर्सा जिल्ला शाखाले बुधबार वीरगञ्जस्थित रक्त सञ्चार केन्द्र (ब्लड बैंक) परिसरमा रक्तदान तथा सरसफाइ कार्यक्रम आयोजना गरेको छ।

दिवसको अवसर पारेर नेपाल रेडक्रस सोसाइटी पर्सा जिल्ला शाखाको भवन परिसर तथा रक्त सञ्चार केन्द्र परिसरमा सरसफाइ गर्नुका साथै रक्तदान कार्यक्रमसमेत आयोजना गरिएको शाखा सभापति बृजकिशोर पटेलले जानकारी दिए।

रक्तदान कार्यक्रमको शुभारम्भ शाखा सभापति पटेल आफैंले रक्तदान गरेर गरेका थिए। रक्तदानमार्फत युवाहरूलाई सामाजिक सेवामा सक्रिय सहभागी हुन प्रेरित गर्ने उद्देश्यले कार्यक्रम आयोजना गरिएको उनले बताए।

रक्त सञ्चार केन्द्र वीरगञ्जका प्राविधिक प्रमुख सौरभराज पाण्डेका अनुसार बुधबार दिउँसो ३ बजेसम्म २० जनाले रक्तदान गरिसकेका छन्। रक्तदान गर्नेहरूमा नेपाल रेडक्रस सोसाइटी पर्सा शाखाका सभापति बृजकिशोर पटेलसहित अमित साह, राधेकृष्ण पाण्डे, ओमकुमार पटेल, तीर्थराज साह, मनिष सिंहलगायत रहेका छन्।

अन्तर्राष्ट्रिय युवा दिवसले युवाको सामाजिक उत्तरदायित्व, नेतृत्व क्षमता र समुदायप्रतिको योगदानलाई प्राथमिकता दिने भएकाले रक्तदान तथा सरसफाइ जस्ता मानवीय एवं सामाजिक सेवाका कार्यक्रमले दिवसको उद्देश्यलाई व्यवहारमा उतार्न सहयोग पुग्ने आयोजकले जनाएको छ।

रेडक्रस पर्सा शाखाले आगामी दिनमा पनि मानवीय सेवासँगै सामाजिक सचेतना, सरसफाइ तथा रक्तदानसम्बन्धी कार्यक्रमलाई निरन्तरता दिने जनाएको छ।