वीरगंज | रुसको मध्यभागमा पर्ने ऊर्जासम्पन्न तातारस्तान क्षेत्रमा रहेको निज्नेकाम्स्क सहरमा युक्रेनी ड्रोन आक्रमणमा कम्तीमा १३ जनाको मृत्यु भएको छ ।

सोमबार भएको आक्रमणमा एक बालक र मध्य एसियाली देशका नागरिकसहित १३ जनाको मृत्यु भएको हो । ४८ जना घाइते भएका छन् ।

रुस–युक्रेन सीमाबाट एक हजार किलोमिटर टाढा रहेको यस क्षेत्रमा धेरै ठूला तेल प्रशोधन केन्द्र छन् । दुवै पक्षले एकअर्काका पूर्वाधारलाई लक्षित गर्दै लामो दूरीका आक्रमण तीव्र बनाएसँगै युक्रेनले पछिल्ला आक्रमणमा यस्ता रिफाइनरीलाई निशाना बनाउँदै आएको छ ।

सोमबारको आक्रमणमा औद्योगिक तथा नागरिक पूर्वाधारमा क्षति पुगेको निज्नेकाम्स्कका मेयर रादमिर बेल्यायेभले टेलिग्राममार्फत जारी गरेको वक्तव्यमा बताए ।

रुसी अनुसन्धानकर्ताहरूले यस घटनालाई आतंकवादी आक्रमणको संज्ञा दिँदै अनुसन्धान सुरु गरिएको जानकारी दिएका छन् । रुसी विदेश मन्त्रालयकी प्रवक्ता मारिया जाखारोभाले किभमाथि जानाजानी सर्वसाधारणलाई निशाना बनाएको आरोप लगाएकी छन् ।

युक्रेनी सेनाले पनि रातभर भएको आक्रमणमा तानेको तेल रिफाइनरीलाई निशाना बनाएको र त्यहाँ आगलागी भएको पुष्टि गरेको छ । युक्रेनले रुसी तेल रिफाइनरीलाई निशाना बनाएर गरेको आक्रमणका कारण रुसमा इन्धनको अभाव हुनुका साथै तेल प्रशोधन क्षमतामा समेत कमी आएको छ ।

सोमबारपछि किभले युक्रेनको विशेष ड्रोन टोलीले ट्युमेन क्षेत्रमा रहेको रुसी पेट्रोकेमिकल प्लान्टमा समेत आक्रमण गरेको बताएको छ ।

युक्रेनी राष्ट्रपति भोलोदिमिर जेलेन्स्कीले यस अभियानको उद्देश्य रुसी राष्ट्रपति भ्लादिमिर पुटिनलाई युक्रेनमा चार वर्षभन्दा बढी समयदेखि जारी आक्रमण अन्त्य गर्न वार्ताको टेबुलमा ल्याउनु रहेको बताएका छन् ।

“हामी पूर्ण रूपमा तर्कसंगत जवाफ दिइरहेका छौँ । रुसको हरेक आक्रमणको हाम्रो पक्षबाट कडा जवाफ दिइनेछ । रुसको युद्ध अब उनीहरूकै घरमा बढीभन्दा बढी महसुस हुनेछ,” जेलेन्स्कीले आइतबार सामाजिक सञ्जालमा पोस्ट गर्दै भनेका छन् ।