पर्सा । पर्साको पकाहा मैनपुर गाउँपालिका–३ मा समृद्ध नेपाल फाउन्डेसनको आयोजनामा निःशुल्क आँखा जाँच शिविर सम्पन्न भएको छ। शिविरमा स्थानीय करिब २०० जनाको आँखा परीक्षण तथा पूर्ण स्वास्थ्य जाँच गरिएको आयोजकले जनाएको छ। आँखासम्बन्धी समस्या पहिचान गर्नुका साथै सहभागीहरूको समग्र स्वास्थ्य अवस्थाबारे समेत परीक्षण गरिएको थियो।

शिविरमा नारायणी वयोदा अस्पतालका डा. पवन सिंह र डा. साहिल अली तथा वीरगन्ज आई कम्युनिटी सेन्टरका डा. महेश सिंह धामी र डा. प्रभात चौरसिया लगायतका स्वास्थ्यकर्मीहरूले स्वास्थ्य परीक्षण तथा परामर्श दिएका थिए। शिविरमा निःशुल्क आँखा जाँच, औषधि वितरण तथा मोतियाबिन्दुसम्बन्धी परीक्षण समेत गरिएको थियो। आवश्यकताअनुसार सहभागीहरूलाई निःशुल्क औषधि वितरण गरिएको आयोजकले जनाएको छ।

आँखा स्वास्थ्यप्रति जनचेतना अभिवृद्धि गर्ने उद्देश्यले आयोजना गरिएको शिविरमा स्थानीयवासीको उल्लेख्य सहभागिता रहेको थियो। आयोजकका अनुसार समयमै आँखा परीक्षण गरी सम्भावित समस्याको पहिचान गर्न सके दृष्टिसम्बन्धी जटिलताबाट बच्न सकिन्छ। “आँखा हाम्रो अमूल्य सम्पत्ति हो, समयमै जाँच गरौं, सुरक्षित भविष्य बनाऔं” भन्ने सन्देशसहित शिविर सञ्चालन गरिएको थियो।

समृद्ध नेपाल फाउन्डेसनद्वारा आयोजित उक्त शिविरलाई STUDYLAND Education Foundation लगायतले सहयोग गरेको जनाइएको छ। साथै, शिविरमा सहभागीलाई चस्मामा २० प्रतिशत छुटको व्यवस्था समेत गरिएको थियो।