वीरगंज | साउन १६
राष्ट्रिय अग्रवाल प्रज्ञा प्रतिष्ठान र वीरगञ्ज टोस्टमास्टर्स क्लबको संयुक्त आयोजनामा ‘ओपन डिबेट एण्ड इम्प्रोम्प्टु स्पिच च्याम्पियनसिप २०२६’ को फाइनल चरण शनिबार वीरगञ्जमा सम्पन्न भएको छ।
आदर्शनगरस्थित त्रिशला रेस्टुरेन्टमा आयोजित कार्यक्रममा समाजसेवी तथा उद्योगपति जगदीश अग्रवाल प्रमुख अतिथिका रूपमा सहभागी भएका थिए। प्रतियोगिता युवाहरूमा सार्वजनिक वक्तृत्वकला, तर्कशक्ति, आत्मविश्वास तथा नेतृत्व क्षमताको विकास गर्ने उद्देश्यले आयोजना गरिएको आयोजकले जनाएको छ।
कार्यक्रममा राष्ट्रिय अग्रवाल प्रज्ञा प्रतिष्ठानकी अध्यक्ष ज्योति क्याल तथा वीरगञ्ज टोस्टमास्टर्स क्लबकी अध्यक्ष खुशी अग्रवाल ले सहभागी विद्यार्थीलाई निरन्तर अध्ययन, अभ्यास र नेतृत्व विकासमा जोड दिन आग्रह गरेका थिए।
प्रतिष्ठानले आफ्नो उद्देश्य दूरदर्शी नेतृत्व विकास, आजीवन सिकाइको संस्कार, साहित्य तथा सामाजिक चेतनाको प्रवर्द्धन तथा उद्यमशीलताको अभिवृद्धिमार्फत नैतिक, समुन्नत र समृद्ध समाज निर्माण रहेको जनाएको छ। संस्थाले ज्ञान, नेतृत्व, सेवा र समृद्धि लाई आफ्नो मूल मूल्यका रूपमा अघि बढाएको छ।
कार्यक्रममा समाजसेवी एवं उद्योगपति गणेश लाठ, वीरगञ्ज उद्योग वाणिज्य संघका अध्यक्ष हरि गौतम, मानवसेवा आश्रमका देवेश गुप्ता, शिक्षाविद् राजेन्द्र कोइराला, उद्योग वाणिज्य महासंघ मधेश प्रदेशका निवर्तमान अध्यक्ष अशोक टेमानी तथा मधेश विश्वविद्यालयका उपकुलपति डा. दीपक शाक्य लगायतको उपस्थिति रहेको थियो।
प्रतियोगिताको फाइनल चरणमा कक्षा ७, ८ र ९ का विद्यार्थीहरूले “इन्टरनेटका फाइदा र बेफाइदा” तथा “सामाजिक सञ्जालका फाइदाभन्दा बेफाइदा बढी छन्” भन्ने विषयमा ओपन डिबेट गर्दै आफ्ना तर्क, विश्लेषण र प्रस्तुति क्षमता प्रभावशाली रूपमा प्रस्तुत गरेका थिए।
आयोजकका अनुसार यस्ता प्रतियोगिताले विद्यार्थीहरूमा आलोचनात्मक सोच, प्रभावकारी सञ्चार कला र नेतृत्व क्षमताको विकासमा महत्वपूर्ण योगदान पुर्याउने विश्वास व्यक्त गरिएको छ।
