वीरगंज | त्रिभुवन अन्तर्राष्ट्रिय विमानस्थलमा सरसफाइको काममा खटिएका एक कर्मचारीलाई फोहरमा लुकाइएको सुन निकालेर बाहिर लैजान खोजेको आरोपमा विमानस्थल प्रहरीले पक्राउ गरेको छ ।

पक्राउ पर्नेमा सुनगाभा सगरमाथा सर्भिस प्रालिमार्फत विमानस्थल सरसफाइमा कार्यरत ४० वर्षीय डिकबहादुर राउत रहेका छन् । विमानस्थल सुरक्षा जाँचका क्रममा उनलाई नियन्त्रणमा लिइएको विमानस्थल प्रहरी कार्यालयले जनाएको छ ।

विमानस्थल प्रहरीका एसपी राजकुमार सिलवालका अनुसार राउतले विमानस्थलभित्र रहेको डस्टबिनबाट संकलन गरिएको फोहरबाट सुन निकालेर बाहिर लैजान लागेको आशङ्कामा जाँच गरिएको थियो । सो क्रममा फोहरको पोको स्क्रिनिङ गर्दा ४.४ ग्राम सुन फेला परेको बताइएको छ ।

घटनाबारे थप अनुसन्धान भइरहेको र बरामद सुनको स्रोत तथा उद्देश्यबारे सोधपुछ जारी रहेको प्रहरीले जनाएको छ ।