पर्सा । पर्साको जगरनाथपुर गाउँपालिकामा आयोजित चौथो मेयर कप–२०८२ को उपाधि जागृत युवा क्लबले जितेको छ। बिरगंज महानगरपालिका उप–मेयर इम्तियाज आलमको प्रमुख आतिथ्यतामा सम्पन्न फाइनल खेलमा उनले खेलप्रतिको कदर गर्दै खेलाडीहरूलाई सफलताको शुभकामना दिएका थिए। मधुवाहा क्रिकेट मैदानमा भएको फाइनलमा दर्शकहरूको उत्साहजनक उपस्थिति रहेको थियो।
सुरुमा ब्याटिङ गरेको वडा नं. ६ को टोलीले १८ ओभर ५ बलमा सबै विकेट गुमाउँदै १०१ रनको योगफल बनायो। १०२ रनको लक्ष्य पछ्याउँदै मैदानमा उत्रिएको जागृत युवा क्लबले १३ ओभर ५ बलमै ४ विकेटको क्षतिमा लक्ष्य पूरा गर्दै उपाधि आफ्नो नाममा पार्यो। शनिबार सम्पन्न फाइनल खेलमा जगरनाथपुर–६ को टोली पराजित हुँदै उप–विजेता बनेको हो।
विजेता बनेको जागृत युवा क्लबलाई गाउँपालिका अध्यक्ष श्रीकान्त प्रसाद यादवले ५१ हजार रुपैयाँको चेक तथा ट्रफी प्रदान गरे। उप–विजेता वडा नं. ६ लाई उपाध्यक्ष बिविता सिंह क्षेत्री र प्रमुख प्रशासकीय अधिकृत सन्देश कुमार यादवले २५ हजार रुपैयाँको चेक तथा ट्रफी प्रदान गरे।
फाइनल खेलको म्यान अफ द म्याच जागृत युवा क्लबका अनिल महरा घोषित भए। बेस्ट ब्याट्सम्यान सुजित पटेल (जागृत युवा क्लब), बेस्ट फिल्डर सन्दिप पटेल (वडा नं. ६), बेस्ट बलर सहजाद देवान – १९ विकेट (वडा नं. २) र म्यान अफ द सिरिज दिपु राउत (वडा नं. २) बने।
कार्यक्रममा जगरनाथपुर–५ का वडाध्यक्ष बिहारी महतो नुनिया, वडा नं. ६ का वडाध्यक्ष अयोध्या प्रसाद कुर्मी, कृषि शाखा प्रमुख दया चौहानलगायतको उपस्थिति रहेको थियो।
कार्यक्रम सञ्चालन शिक्षक रूपनारायण प्रसाद साहले गरेका थिए।
