बीरगंज | अभिलाष गुप्ता l बीरगंज महानगरपालिका–१४, पिपरा स्थित गुणराज पाठक मेमोरियल नर्सिङ क्याम्पसमा अध्ययनरत नयाँ विद्यार्थीहरूलाई स्वागत गर्न एक भव्य कार्यक्रम सम्पन्न भएको छ। “WELCOME PROGRAM – PCL Nursing 2nd Year” शीर्षकमा आयोजित सो कार्यक्रम बीरगंजस्थित भिष्वा होटलमा आयोजना गरिएको थियो।
कार्यक्रममा बीरगंज महानगरपालिकाका मेयर राजेशमान सिंहको प्रमुख आतिथ्य रहेको थियो। उनले कार्यक्रममा बोल्दै नर्सिङ पेशा सेवा, समर्पण र मानवता सँग जोडिएको पेशा भएको बताउँदै विद्यार्थीहरूलाई आफ्नो अध्ययनमा प्रतिबद्ध रहन आग्रह गरे।
कार्यक्रममा प्रमुख अतिथि सिंहले गुणराज पाठक मेमोरियल नर्सिङ क्याम्पसले छोटो समयमा नै नर्सिङ शिक्षामा उत्कृष्ट योगदान पुर्याउँदै आएको भन्दै प्रशंसा गरेका थिए। साथै, उनले दक्ष र सेवाभावी नर्स तयार गर्न क्याम्पसको भूमिकालाई महत्वपूर्ण रहेको उल्लेख गरे।
कार्यक्रममा क्याम्पस प्रमुख, शिक्षक–शिक्षिका, विद्यार्थी, अभिभावक तथा अतिथिहरूको उत्साहजनक सहभागिता रहेको थियो। स्वागत कार्यक्रमको क्रममा नयाँ विद्यार्थीहरूले सांस्कृतिक प्रस्तुति, गीत, कविता र अनुभव–विचारहरू प्रस्तुत गरेका थिए।
उक्त नर्सिङ क्याम्पस Council for Technical Education and Vocational Training (CTEVT) अन्तर्गत सञ्चालन हुँदै आएको हो।
कार्यक्रमको अन्त्यमा धन्यवाद ज्ञापन गर्दै आयोजक समितिले सहभागिता जनाएका सबैप्रति आभार व्यक्त गरेको थियो।
