काठमाडौं | ताप्लेजुङको मैवाखोला गाउँपालिका-५ स्थित पार्टीडाँडा माध्यमिक विद्यालयबाट डेढ वर्ष अगाडि चोरिएका ८ वटा ल्यापटप बोरामा पोको पारेर गाडेको अवस्थामा भेटिएका छन् ।

उक्त विद्यालयबाट हराएका ८ ल्यापटप बोरामा पोको पारेर गाउँपालिकाकै पित्तोलुङमा गाडेको अवस्थामा मंगलबार भेटिएका हुन् ।

मैवाखोला गाउँपालिकाका अध्यक्ष विजयप्रकाश वनेमले ती ल्यापटप भेटिएको पुष्टि गरेका छन् । वनेमका अनुसार २०८० पुस २२ गते राति विद्यालयको ढोका फोडेर ११ वटा ल्यापटप चोरिएका थिए ।

चोरिएका ल्यापटपमध्ये तीनवटा केही दिनमै भेटिए । तर अन्य आठवटा गायब थिए । ती ल्यापटप ह्युमन प्राक्टिस फाउन्डेसन (एचपीएफ) ले शैक्षिक गुणस्तर सुधार कार्यक्रमअन्तर्गत आईसीटी कक्षाका लागि दिएको थियो । विद्यालय प्रशासनले जिम्मा लिएको केही दिनमै ती ल्यापटप चोरिएका थिए ।

अध्यक्ष वनेमले चोरीमा संलग्नको खोजी जारी रहेको बताए । उनले घटनामा संलग्नलाई पहिचान गरी कारबाहीका लागि जिल्ला प्रशासन कार्यालय र जिल्ला प्रहरी कार्यालयलाई आग्रह गरिएको बताए ।