वीरगन्ज । लालबाबु सिंह । सामाजिक युवा एकता क्लब वीरगन्जले शनिबार वीरगन्ज–१२ ब्रहमचोकमा रक्तदान कार्यक्रम सम्पन्न गरेको छ । कार्यक्रममा ३ महिला सहित ५१ जनाले रक्तदान गरेका छन् ।
रक्तदान गर्नेहरूमा चन्दादेवी, अनिता देवी कानु, प्रमिला महतो, डा. मृगेन्द्र कुमार सिंह, विशाल कुमार महतो, जयकिशन साह, सुजन ढुङ्गेल, असर्फी प्रसाद चौरसिया, नवीन साह लगायत थिए ।
क्लबका अध्यक्ष बिक्की महतो धानुकको अध्यक्षतामा तथा नेपाल रेडक्रस सोसाइटी मधेश प्रदेशका सभापति फुलमहम्मद मियाको प्रमुख आतिथ्यमा कार्यक्रम सम्पन्न भएको थियो । कार्यक्रममा समाजसेवी प्रकाश उपाध्याय, नेपाल रेडक्रस सोसाइटी पर्साका सभापति बृजकिशोर पटेल, वीरगन्ज कपडा बैंकका अध्यक्ष लालबाबु सिंह, राजेन्द्र भट्टराई, विरसमशेर कुर्मी, क्लबका उपाध्यक्ष सिदार्थ कुमार मण्डल, सचिव अमन कुमार मण्डल, सदस्यहरू संजय महतो धानुक, चन्दन कुमार मण्डल, सचिन महतो धानुक, अनिष मण्डल लगायत स्थानीय अग्रज तथा युवाहरूको बाक्लो उपस्थिति रहेको थियो ।
प्रमुख अतिथिले अध्यक्ष बिक्की महतोलाई ब्लड संकलन ब्याग हस्तान्तरण गरेर कार्यक्रमको शुभारम्भ गरिएको थियो । क्लबका पूर्व अध्यक्ष धानुकले क्लबले प्रत्येक वर्ष दुईपटक रक्तदान कार्यक्रम गर्दै आएको र वीरगन्जमा हाल बढ्दो गर्मीका कारण रगत अभाव भएकोले आकस्मिक रूपमा कार्यक्रम आयोजना गरिएको बताए ।
प्रमुख अतिथि मियाले हाल वीरगन्जमा बिरामीलाई रगत अभावको समस्या रहेको र सबैलाई रक्तदान गर्न अपिल गर्दै मनकारी व्यक्ति तथा संस्थालाई धन्यवाद दिए । नेपाल रक्तसञ्चार केन्द्र वीरगन्जका प्राविधिक धिरेन्द्र झाको नेतृत्वमा स्वयंसेवकहरूले रक्तदानमा सहयोग गरेका थिए ।
