काठमाडौं । माधवकुमार नेपाल नेतृत्वको नेकपा एकीकृत समाजवादी र वामदेव गौतम नेतृत्वको नेकपा एकता राष्ट्रिय अभियानबीच पार्टी एकता गर्ने सहमति भएको छ । दुवै पक्षका अध्यक्षले शुक्रबार सहमतिपत्रमा हस्ताक्षर गरेका छन्, जसअनुसार साउन २ गते एकता घोषणा गरिनेछ । सहमतिपत्रमा भनिएको छ, ‘राजनीतिक दर्शन, सिद्धान्त, कार्यक्रम, रणनीति र कार्यदिशामा एकरूपता रहेको र नेपालको कम्युनिस्ट आन्दोलनलाई एकताबद्ध गर्नुपर्ने आजको ऐतिहासिक आवश्यकतालाई ध्यानमा राख्दै एकताबद्ध हुने सहमति गरियो ।’

यो एकता २०७७ सालमा तत्कालीन नेकपा विभाजनपछि विकसित राजनीतिक घटनाक्रमको एउटा महत्त्वपूर्ण मोड हो । नेकपा विभाजनका बेला वामदेव गौतमले छुट्टै ‘नेकपा एकता अभियान’ चलाएका थिए । त्यसपछि नेकपा एमाले र नेकपा माओवादी केन्द्र अलग भएका थिए भने २०७८ सालमा माधव नेपालले नेकपा एकीकृत समाजवादीको गठन गरेका थिए ।

विगतमा गौतमले कहिले नेकपा एमालेसँग त कहिले नेकपा एकीकृत समाजवादीसँग एकता गर्ने बताउँदै आएका थिए । अन्ततः उनी नेकपा एकीकृत समाजवादीसँग एकता गर्न तयार भएका हुन् । यो एकताले नेपालको कम्युनिस्ट राजनीतिमा नयाँ समीकरणको सम्भावना देखाएको छ ।