वीरगञ्ज । जीतपुरसिमरा उपमहानगरपालिकाको चालू आर्थिक बर्षको खर्चमा सुधार देखिएको छ । उपमहानगरपालिकाले विगत ६ आर्थिक वर्ष (२०७६/०७७ देखि २०८१/०८२) मा गरेको खर्चको प्रवृत्ति हेर्दा चालु खर्चमा निरन्तर वृद्धि देखिएको छ भने पुँजीगत खर्चमा भने उतारचढाव आएको छ। यसले विकास निर्माणका कार्यभन्दा दैनिक प्रशासनिक र सञ्चालन खर्चमा बढी रकम विनियोजन भइरहेको देखिएको छ ।
जीतपुर सिमरा उपमहानगरपालिकाले सार्वजनिक गरेको तथ्यांकअनुसार, आर्थिक वर्ष २०७६/०७७ मा कुल खर्चको ५०.३०% रहेकोमा, २०८१/०८२ मा यो बढेर ७३.९६% पुगेको छ। यो अवधिमा चालु खर्चको हिस्सा ६३.८२% बाट बढेर ८६.२१% पुगेको छ। यसले कर्मचारी तलब, भत्ता, कार्यालय सञ्चालन लगायतका दैनिक खर्चमा उल्लेखनीय वृद्धि भएको देखाएको छ ।
अर्कोतर्फ, पुँजीगत खर्चको अवस्था भने सन्तोषजनक देखिँदैन। आर्थिक वर्ष २०७६/०७७ मा ३३.३२% रहेको पुँजीगत खर्च २०८०/०८१ मा ३९.३२% मा झरेको थियो, यद्यपि २०८१/०८२ मा यो बढेर ६०.७१% पुगेको छ। पुँजीगत खर्चको अवस्था हेर्दा पूर्वाधार विकास, भौतिक संरचना निर्माण र दीर्घकालीन योजनाहरूमा गरिएको लगानी पर्याप्त छैन भन्ने देखाएको छ । यसमा भएको अस्थिरताले विकास आयोजनाहरूको कार्यान्वयनमा चुनौतीहरू रहेको संकेत गरेको छ ।
