वीरगन्ज । लालबाबु सिंह । साउथ सिटी हस्पिटल वीरगन्जले वीरगन्ज–१५ स्थित द हिमाल नर्सिङ्ग इन्स्टिच्युटको प्राङ्गणमा रक्तदान कार्यक्रम सम्पन्न गरेको छ । कार्यक्रममा १२ महिला सहित ४१ जनाले रक्तदान गरेका छन् ।

रक्तदान गर्नेहरुमा अन्जली यादव, बिनिता श्रेष्ठ, सोफिया मल्ल, रितिका यादव, मिना पाण्डे, अन्जनी यादव, प्रनिशा न्यौपाने, प्रीयान्शु यादव, दिलमाया प्रजा, लालबाबु चौधरी, जितेन्द्र कुमार यादव, साहिल अन्सारी, रामबाबु मुखिया, मो. नुरबाबु हास्मी लगायत सहभागी भएका थिए ।

हस्पिटलका एडमिनिस्ट्रेशन हेड लालबाबु चौधरीले ‘रक्तदान महादान, जीवनदान’ भएको भन्दै प्रत्येक वर्ष दुई पटक रक्तदान कार्यक्रम गर्ने योजना रहेको बताए । हाल गर्मीका कारण वीरगन्जमा रगत अभाव भएकोले तत्कालका लागि कार्यक्रम गरिएको उनले जानकारी दिए ।

कार्यक्रममा नेपाल रक्तसञ्चार केन्द्र वीरगन्जका प्रमुख सौरभ राज पाण्डेले वीरगन्जमा बिगत दुई महिनादेखि रक्तदान गर्नेको कमीले उपचारमा समस्या आएको बताउँदै निरन्तर अपिल गर्दा पनि माग अनुसार रगत जुटाउन कठिन भइरहेको बताए । उनले सबैलाई नियमित रक्तदान गर्न आग्रह गरे ।

कार्यक्रममा नेपाल रेडक्रस सोसाइटी पर्साका सदस्य दया शंकर सिंह, रेषमकोठी उपशाखाका सचिव तथा वीरगन्ज कपडा बैंकका अध्यक्ष सञ्चारकर्मी लालबाबु सिंह, सञ्चारकर्मी अभिलाश गुप्ता, राज सराफ, राम आर्य, अर्जुन गुप्ता, प्रहलाद चौरसिया लगायत शिक्षक, विद्यार्थी र हस्पिटलका पदाधिकारीहरुको सहभागिता थियो ।

रक्तदानमा नेपाल रक्तसञ्चार केन्द्र वीरगन्जका प्रमुख पाण्डेको नेतृत्वमा प्राविधिक जितेन्द्र कुश्वाहा, नितेश यादव लगायत स्वयंसेवकहरुले सहयोग गरेका थिए ।