कपिलवस्तु । अजय मिश्र । मलेसियामा सम्पन्न एसीसी यू–१६ इस्ट जोन कप क्रिकेटमा नेपाललाई उपाधि दिलाउन महत्त्वपूर्ण योगदान पुर्याएका कपिलवस्तुका युवा खेलाडी रौनक श्रीवास्तवलाई गृह नगर कृष्णनगरमा भव्य स्वागत तथा सम्मान गरिएको छ।
कृष्णनगर नगरपालिका वडा नं. २ का वडाध्यक्ष कृष्ण कुमार गुप्ताले छुट्टै कार्यक्रम गरी कृष्णनगरको गोलघरमा रौनकलाई सम्मान गरेका हुन्। यस्तै, नेपाल हज कमिटीका सदस्य तथा पूर्व क्रिकेटर मिर्जा राशिद बेगसहितको टोलीले समेत एक कार्यक्रमबीच रौनकलाई सम्मान गर्दै उनको योगदानको प्रशंसा गरे।
रौनकले मलेसियामा सम्पन्न एसियन क्रिकेट काउन्सिल (एसीसी) यू–१६ इस्ट जोन कपमा एक शतक र एक अर्धशतकसहित २९६ रन बनाउँदै नेपाललाई उपाधि जिताएका थिए। उनी प्रतियोगिताको सर्वोत्कृष्ट खेलाडी समेत घोषित भएका छन्।
कृष्णनगर नगरपालिका–१ मडहाका रौनकलाई उद्योग वाणिज्य संघ कृष्णनगरका अध्यक्ष रितेश शर्माले उद्योगी तथा व्यवसायीहरूमाझ समेत स्वागत तथा सम्मान गरे। आयोजकहरूले रौनकले आफ्नो नगर, जिल्ला र देशको नाम विश्वभर चिनाएको भन्दै उनको उज्ज्वल भविष्यको शुभकामना व्यक्त गरे।
सम्मान कार्यक्रममा युवा नेता कुनाल प्रताप शाह, प्रेम शंकर शुक्ल, वडाध्यक्ष सगीर अहमद खान, राहुल मोदनवाल, रेनु शर्मा, प्रहरी निरीक्षक ईश्वर लौडारी, सशस्त्र प्रहरी नायब उपरीक्षक तुला बहादुर चौधरीलगायतको उपस्थिति रहेको थियो।
