वीरगंज | तराई–मधेस क्षेत्रमा पछिल्लो समय जलवायु परिवर्तनका कारण परेको खडेरीले गम्भीर खानेपानी संकट उत्पन्न गरेको छ। यसै सन्दर्भमा वीरगंज पुगेर प्रभावित क्षेत्रहरूको स्थलगत अवलोकन गरिएको छ।
पर्सा, बारा, रौतहट लगायतका जिल्लाहरूमा अधिकांश चापाकल सुकेका कारण जनजीवन अत्यन्तै कष्टकर बनेको छ। वीरगंज महानगरपालिकाका विभिन्न वडाहरू, टोलहरू र घर–घरमा पुगेर नागरिकको अवस्था बुझ्दै निरीक्षण गरिएको जनाइएको छ।
हालसम्म बारा र पर्सा जिल्लामा २३७ भन्दा बढी स्थानमा डिप बोरिङ सम्पन्न गरिएको भए पनि पानीको समस्या पूर्ण रूपमा समाधान हुन सकेको छैन। नागरिकहरू दैनिक उपभोगका लागि पानी खोज्दै निकै समस्या भोगिरहेका छन्।
स्थानीयबासीहरूप्रति गहिरो सहानुभूति व्यक्त गर्दै, वीरगंज लगायत तराई–मधेस क्षेत्रमा खानेपानी समस्या समाधानका लागि प्रदेश र स्थानीय सरकार, खानेपानी तथा सरसफाइ क्षेत्रमा संलग्न राष्ट्रिय तथा अन्तर्राष्ट्रिय निकायलाई आपसी सहकार्य र सहयोगका लागि अपील गरिएको छ।
खानेपानी संकटको समाधानका लागि सबै तहका सरकार तथा सरोकारवाला निकायबीच समन्वय र एकताबद्ध प्रयास आवश्यक रहेको जनाइएको छ। समस्या दीर्घकालीन रूपमा समाधान गर्न तत्काल आवश्यक योजना र पूर्वतयारी गर्नुपर्नेमा जोड दिइएको छ।
