वीरगंज | ताप्लेजुङस्थित संयुक्त बजार अनुगमन टोलीले एउटै पान नम्बरबाट दुई वा सोभन्दा बढी पसल तथा व्यवसाय सञ्चालन नगर्न र व्यवसायको प्रकृति अनुसार दर्ता प्रकृयामा जान निर्देशन दिएको छ। भेटेनरी अस्पताल तथा पशु सेवा विज्ञ केन्द्र ताप्लेजुङको संयोजनमा गरिएको संयुक्त बजार अनुगमनका क्रममा एउटै उक्त कार्य भइरहेको पाइएपछि अनुगमन समितिले व्यवसायको प्रकृति अनुसार छुट्टै दर्तासहितका प्रकृयामा जान निर्देशन दिएको हो। अनुगमन टोलीका संयोजक तथा सहायक प्रमुख जिल्ला अधिकारी सन्दीपा खड्काका अनुसार माछा तथा मासु बिक्री गर्ने केही पसलहरूले एउटै पान नम्बरबाट दुई वा सोभन्दा बढी पसल सञ्चालन गरिरहेको पाइएको छ।

अनुगमन समितिले एउटा पान नम्बरबाट एउटा मात्र पसल तथा व्यवसाय सञ्चालन गर्न सकिने भएकाले सोही पान नम्बरबाट अर्को व्यवसाय सञ्चालन गरिरहेकाहरूलाई १५ दिनभित्र व्यवसाय दर्ता तथा नवीकरणमा जान निर्देशन दिएको सहायक प्रजिअ खड्काले बताइन्। भेटेनरी अस्पताल तथा पशु सेवा विज्ञ केन्द्र ताप्लेजुङका प्रमुख डाक्टर रोशन दाहालका अनुसार केही पसलहरूमा सिद्रासहितका उपभोग्य वस्तु अखाद्य देखिएकाले जफत गरिएको छ। तराईबाट ल्याइने माछाको उपभोग्यता निर्धारणका लागि अनुगमन टोलीले नमूना समेत संकलन गरी परीक्षणको प्रबन्ध गरिएको समेत दाहालले जानकारी दिए। अनुगमन समितिले म्याद नाघेका पेय पदार्थसहितका सामान समेत जफत गरी नष्ट गरेको छ। सहायक प्रजिअ खड्का नेतृत्वको अनुगमन टोलीले मूल्य सूची अनिवार्य राख्न तथा नियमित अद्यावधिक गर्न, व्यवसायको प्रकृति अनुसार दर्ता तथा नवीकरण प्रकृयामा जान, माछा तथा मासु पसल सञ्चालकलाई बिक्री स्थलको नियमित सफाइ व्यवस्थापन गर्न, बध केन्द्र व्यवस्थापन गर्न, मासुजन्य उत्पादन बिक्री स्थलको अगाडि सिसासहितका सुरक्षाको प्रबन्ध गर्न समेत सल्लाह दिएको छ।

अनुगमन टोलीमा रहेका ताप्लेजुङ उद्योग वाणिज्य संघका अध्यक्ष विकास गौतमले उपभोक्तामैत्री बजारका लागि कार्यतालिका बनाएर अनुगमनलाई थप प्रभावकारी बनाउने योजना अघि सारिएको जानकारी दिए। गौतमले कार्यतालिका अनुसार माछा तथा मासु, तरकारीबाली तथा फलफूल, खाद्यान्न लगायतका दैनिक उपभोग्य वस्तु र पेय पदार्थसहितलाई अनुगमनका लागि वार्षिक कार्यतालिका बनाउने जानकारी दिए। घरेलु तथा साना उद्योग कार्यालय ताप्लेजुङका सूचना अधिकारी तथा उद्यम विकास सहजकर्ता नवीन भट्टराईले प्रभावकारी अनुगमनका लागि कार्यतालिका बनाइ नियमित रूपले अनुगमन टोली स्थलगत रूपमा खटिने जानकारी दिए।