वीरगंज | पर्साको जगरनाथपुर गाँउपालिकाका अध्यक्ष श्रीकान्त प्रसाद यादवले कृषि र किसान गाँउपालिकाको पहिलो प्राथमिकतामा रहेको बताएका छन् । सोमबार मधेशखबर मल्टिमिडिया प्रालिाको समन्वयमा जगरनाथपुर गाँउपालिका वडा नम्बर ४ गढैयामा आयोजित गाँउपालिकास्तरीय सार्वजनिक सुनुवाई कार्यक्रममा किसानहरुको गुनासो सुन्दै अध्यक्ष यादवले कृषिको व्यवसायिकरण र आधुनिकिरण गर्दै किसानको जिवनस्तर उकास्नका लागि पालिकाले विभिन्न योजनाहरु सञ्चालन गरिरहेको बताए । समयमै सिंचाई ,बीउ र मलखाद पाउन नसकेर किसान अझैपनि समस्यामा रहेको भन्दै उनले ती समस्या सम्बोधनका लागि पालिकाले भरमग्दुर प्रयास गरिरहेको बताए । नेपालमा मलखादको समस्या वर्षेनी रहेको अवस्थामा छिमेकी मुलुक भारतका बजारबाट किसानले एक दुई बोरा मल लिएर आउँदा सीमामा सुरक्षाकर्मीबाट दुव्र्यवहार भोग्नु परिरहेको भन्दै उनले कार्यक्रममा सहभागी पर्साका नेपाल प्रहरीका उपरीक्षक गौतम मिश्र र सशस्त्र प्रहरी उपरीक्षक राधेश्याम धिमालको ध्यानाकर्षणपनि गराए ।

किसानका खेतमा सिंचाईका लागि विद्युतको पोल र तार व्यवस्थापन छिट्टै हुने अध्यक्ष यादवले बताए । अध्यक्ष यादवले पालिकाका सामुदायिक विद्यालयहरमा दिवा खाजामा लापरवाही भएको जनगुनासो आएकाले त्यसका लागि अनुगमन गरेर दोषीलाई कारबाही गर्न शिक्षा शाखा प्रमुखलाई उनले निर्देशनपनि दिए । कार्यक्रममा सहभागी नागरिकका अन्य गुनासा र प्रश्नहरु सुनेपछि गाउँपालिका अध्यक्षभने , “आजैदेखि सुधारको सुरुवात गरिनेछ र जिल्लामा उदाहरणीय पालिकाका रूपमा चिनिने गरी काम गर्छौ , यो हाम्रो प्रतिबद्धता हो ।“ कार्यक्रममा गाँउपालिका उपाध्यक्ष बबिता सिंह क्षेत्रीले महिला सशक्तिकरणका लागि सीपमूलक तालिम सञ्चालन गर्दै आएको र आगामी दिनमा महिलाका थप आवश्यकता र चाहना अनुसारका योजनाहरु ल्याइने बताइन् । प्रमुख प्रशासकीय अधिकृत सन्देश यादवले चालु आर्थिक वर्षमा सम्पन्न नमूना योजना र कार्यक्रमहरुका बारेमा जानकारी गराए । साथै आगामी आर्थिक वर्षका नमूना योजना तथा कार्यक्रमहरुको बारेमापनि जानकारी गराउँदै यादवले कार्यालयको सेवा प्रवाह अझ नागरिकमैत्री बनाउन आँफुहरु लागि परेको बताए ।

त्यसअघि कार्यक्रममा बोल्दै स्थानीय रामायण यादवले सीमावर्ती भारतको इनरुवा र भंगहाबाट दैनिक उपभोग्य वस्तु ल्याउँदा सुरक्षाकर्मीबाट अनावश्यक दुःख दिने गरिएको गुनासो गरे। कलावती देवीले महिलाहरूका लागि गढैयामा सिलाई–कटाई तालिमको माग गरिन्।कुश्मी देवीले आफ्नो वडामा महिला भवन निर्माण गरिदिन माग गरिन् । मोहम्मद सनि अन्सारी र सुरेन्द्र पाण्डेले सिँचाइ, ट्रान्सफर जडान र विद्युत लाइन नचलेको विषयमा आवाज उठाए। भने महिला भवन निर्माणको माग कुस्मी देवीले गरिन्। गाउँपालिका अध्यक्ष यादवको अध्यक्षतामा भएको कार्यक्रममा गाँउपालिका उपाध्यक्ष बबिता सिंह क्षेत्री,जिल्ला प्रहरी कार्यालय पर्साका प्रहरी उपरीक्षक गौतम मिश्र, सशस्त्र प्रहरी उपरीक्षक राधेश्याम धिताल, प्रमुख प्रशासकीय अधिकृत सन्देश यादव, वडा अध्यक्षहरू सुभाष प्रसाद यादव, लक्ष्मी साह ,नेपाली प्रसाद कुशवाहा वीरगन्ज जेसीजका अध्यक्ष सरोज चौरसिया, नेपाली कांग्रेस पर्साका कोषाध्यक्ष प्रेम थापाका साथै कार्यपालिका सदस्य , वडा सदस्य , शिक्षक, कर्मचारी र स्थानीयबासीको उल्लेख्य संख्यामा सहभागिता रहेको थियो ।