बारा |सिकिन्द्र साह । बारा जिल्लाको आदर्श कोतवाल गाउँपालिका–१, टोल जमुनियास्थित राष्ट्रिय प्राथमिक विद्यालयमा निशुल्क आँखा जाँच तथा उपचार सेवा सम्पन्न गरिएको छ। सिम्रौनगढ नगर आँखा अस्पतालका बरिष्ठ नेत्र विशेषज्ञ डा. दिलिप कुमार यादवको नेतृत्वमा सञ्चालित उक्त शिविरमा साना बालबालिकाहरूको आँखा परिक्षण तथा उपचार गरिएको हो।
शिविर विद्यालयकै परिसरमा सम्पन्न गरिएको थियो, जसमा विद्यालय व्यवस्थापन समितिका अध्यक्ष तथा सञ्चारकर्मी नुर आलम बादशाह र सिम्रौनगढ नगर अस्पतालका सम्पूर्ण कर्मचारीहरूको उल्लेखनीय सहयोग रहेको थियो।
डा. यादवका अनुसार बालबालिकाहरूमा सामान्य रूपमा देखिने आँखाका रोगहरू जस्तै कन्जन्कटिभाइटिस (रातो आँखा), विभिन्न प्रकारका एलर्जी र ‘लेजि आइ’ (एक आँखा कमजोर भई कम देखिने) समस्याहरूको पहिचान गरिएको छ।
“यी समस्याहरू प्रारम्भिक चरणमै पहिचान गरी उपचार गरेमा गम्भीर अवस्थाबाट जोगिन सकिन्छ,” डा. यादवले बताउनुभयो। “यस्ता शिविरहरू मानविय सेवाको spirit मा आधारित छन्, जसले बालबालिकाहरूको आँखाको स्वास्थ्यमा दीर्घकालीन लाभ पुर्याउने विश्वास लिएको छौँ,” उहाँले थप्नुभयो।
शिविरमा सहभागी अभिभावक तथा विद्यालयका शिक्षकहरूले डाक्टर यादव र सम्पूर्ण स्वास्थ्यकर्मीहरूप्रति आभार व्यक्त गरेका छन्। यसरी सामुदायिक स्तरमा गरिने यस्ता निःशुल्क सेवा कार्यक्रमले ग्रामीण क्षेत्रमा स्वास्थ्य सेवाको पहुँच अभिवृद्धि गर्दै आएको छ।
