वीरगञ्ज | काठमाण्डौबाट वीरगञ्जतर्फ आइरहेको एक मालवाहक ट्रकबाट ठूलो परिमाणमा लागुऔषध चरेश बरामद गरिएको छ। पर्सा जिल्लाको वीरगञ्ज महानगरपालिका–२१, परवानीपुर चोकस्थित सडकखण्डमा प्रहरीले ट्रकसहित एक जनालाई पक्राउ गरेको हो।

प्रदेश २-०३-००१ ख ६३४८ नम्बरको मालवाहक ट्रकमा चरेश लुकाइ ल्याइँदै गरेको विशेष सूचनाको आधारमा प्रहरी चौकी सिर्सिया र जिल्ला प्रहरी कार्यालय पर्साबाट खटिएको संयुक्त टोलीले उक्त ट्रक नियन्त्रणमा लिएको हो। ट्रक जाँचका क्रममा पछाडिको सामान बोक्ने भागमा सेतो प्लास्टिकको बोरा भित्र १३ वटा पोका भेटिएको र त्यसमा ३१९ केजी चरेश फेला परेको प्रहरीले जनाएको छ।

ट्रक चालक मकवानपुर जिल्ला, थाहा नगरपालिका–१२ निवासी ३६ वर्षीय बुद्धी बहादुर स्याङ्तानलाई पक्राउ गरिएको छ। थप अनुसन्धानका क्रममा उनको लगाएको हाफ पाइन्टको खल्तीबाट नेपाली रूपैयाँ १ लाख ९२ हजार नगद समेत बरामद गरिएको छ। साथै, घटनास्थलबाट चालकको मोबाइल फोन पनि बरामद गरिएको छ।

जिल्ला प्रहरी कार्यालय पर्साका प्रमुख प्रहरी उपरीक्षक गौतम मिश्रको निर्देशनमा गरिएको उक्त कारबाहीमा संलग्न टोलीले पक्राउ परेका स्याङ्तानलाई लागुऔषध सम्बन्धी कसुरमा अनुसन्धान अगाडि बढाएको छ। पर्सा जिल्ला अदालतबाट ५ दिनको म्याद थप अनुमति लिएर अनुसन्धान भइरहेको प्रहरी स्रोतले जनाएको छ।

पक्राउ परेका स्याङ्तान र ट्रकसहित बरामद गरिएको ३१९ केजी चरेश, नेपाली रुपैयाँ १ लाख ९२ हजार र एकथान मोबाइल फोन जिल्ला प्रहरी कार्यालय पर्सामा राखिएको छ।