रौतहट | रौतहटमा लागू औषधसहित एक युवकलाई प्रहरीले पक्राउ गरेको छ।
जिल्ला प्रहरी कार्यालय रौतहटबाट खटिएको प्रहरी टोलीले गौर नगरपालिका–३ स्थित बी.पी. चौकमा चेकजाँचको क्रममा भारतबाट नेपालतर्फ आउँदै गरेको ना.१ ह ७८९३ नम्बरको ई–रिक्सा रोकेर चेकजाँच गर्दा ठूलो मात्रामा लागू औषध बरामद भएको हो।
ई–रिक्साका चालक चन्द्रपुर नगरपालिका–४ का २७ वर्षीय अजय बिकले सेतो रंगको प्लास्टिकमा लुकाएर ल्याउँदै गरेका PHENERGAN, BUPRENORPHINE, Cerejack Diazepam र DIAZEPAM नामका विभिन्न इन्जेक्सन गरी कुल ३३० एम्पुल लागू औषध फेला परेको प्रहरीले जनाएको छ। ती इन्जेक्सनहरू Horlicks लेखिएको निलो रंगको डब्बामा लुकाइएको अवस्थामा भेटिएको थियो।
प्रहरीले साथमै प्रयोग गरिएको ना.१ ह ७८९३ नम्बरको ई–रिक्सा, Redmi कम्पनीको मोबाइल फोन र त्यसमा प्रयोग गरिएको सिमकार्ड पनि बरामद गरेको छ।
पक्राउ परेका अजय बि.क.लाई लागू औषध सम्बन्धी मुद्दामा रौतहट जिल्ला अदालतबाट म्याद अनुमति लिई अनुसन्धान भइरहेको जिल्ला प्रहरी कार्यालय रौतहटले जनाएको छ।
