बारा । बाराको देवताल गाउँपालिकाले आर्थिक वर्ष २०८२/०८३ का लागि नीति तथा कार्यक्रमसहितको १४औं गाउँसभा मंगलबार सम्पन्न गरेको छ। गाउँपालिका अध्यक्ष उदय प्रसाद यादवको अध्यक्षतामा सम्पन्न सभामा आगामी वर्षका लागि ३८ करोड ८५ लाख ७९ हजार रुपैयाँको बजेट प्रस्तुत गरिएको हो।

सभामा अध्यक्ष यादवले प्रस्तुत गर्नुभएको नीति तथा कार्यक्रममा शिक्षा, स्वास्थ्य, कृषि, पूर्वाधार विकास, रोजगारी सिर्जना, सामाजिक सुरक्षा लगायतका क्षेत्रमा प्राथमिकता दिइएको छ। साथै सुशासन, पारदर्शिता र दिगो विकासलाई मूल नीतिका रूपमा अघि सारिएको बताइएको छ।

गाउँसभामा वडाध्यक्षहरू, कार्यपालिका सदस्यहरू, गाउँपालिका कर्मचारी, विभिन्न राजनीतिक दलका प्रतिनिधिहरू, सञ्चारकर्मी तथा स्थानीय नागरिकहरूको उल्लेखनीय उपस्थिति थियो।

सभामा विभिन्न वडाबाट आएका सरोकार र सुझावहरूलाई समेटेर आगामी कार्ययोजना तयार पारिने जानकारी प्रमुख प्रशासकीय अधिकृत कृष्ण नन्दन रायले दिनुभयो। साथै उहाँले अधिवेशन तयारीमा सहयोग गर्ने सबैलाई धन्यवाद ज्ञापन गर्दै पारित नीति तथा कार्यक्रम कार्यान्वयनमा लाग्ने प्रतिबद्धता व्यक्त गर्नुभयो।

गाउँसभा समापनका क्रममा अध्यक्ष यादवले “जनताको अपेक्षा अनुसार देवताल गाउँपालिकालाई समावेशी, उत्तरदायी र समृद्ध बनाउन प्रतिबद्ध छौं,” भन्दै आगामी योजनालाई सफलतापूर्वक कार्यान्वयन गरिने आश्वासन दिनुभयो।

कार्यक्रममा प्रमुख प्रशासकीय अधिकृत रायले स्वागत मन्तव्य दिनुभएको थियो भने लेखा प्रमुख मनिष साह कलवारले कार्यक्रम सञ्चालन गर्नुभएको थियो।