वीरगञ्ज । कृष्ण श्रीवास्तव । पर्साको सखुवाप्रसौनी गाउँपालिकाका अध्यक्ष यसवन्त यादवले महिलाको सशक्तिकरण तथा आत्मनिर्भरता अभिवृद्धिमा गाउँपालिकाले विशेष पहल गर्दै आएको बताएका छन्। गाउँपालिकाको आयोजनामा तीन महिनासम्म सञ्चालन गरिएको सिलाई कटाई तालिमको समापन कार्यक्रममा बोल्दै अध्यक्ष यादवले यस्तो प्रतिबद्धता जनाएका हुन्।

गत जेठ ५ गतेदेखि सुरु भएको तालिम बिहीबार सम्पन्न भएको हो। २० जना महिलाहरूको सक्रिय सहभागिता रहेको उक्त तालिमको समापन अवसरमा अध्यक्ष यादवले सहभागी सबैलाई प्रमाणपत्रसहित सिलाई मेसिन हस्तान्तरण गरे।
“सिर्जनशील सीप हासिल गरेर महिलाहरूले घरमै बसेर आम्दानी गर्न सकून् भन्ने उद्देश्यले गाउँपालिकाले यस्तो कार्यक्रम ल्याएको हो,” अध्यक्ष यादवले भने।

कार्यक्रममा प्रमुख प्रशासकीय अधिकृत रामबाबु कुशवाहा, सामाजिक विकास शाखा प्रमुख विनोद यादव, प्रशिक्षक राजमती देवी चौधरीलगायतको उपस्थिति रहेको थियो।
तालिमबाट महिलाहरूमा आत्मविश्वास र स्वरोजगारको भावना बलियो बनेको सहभागीहरूको प्रतिक्रिया रहेको छ।

अध्यक्ष यादवले आगामी दिनमा अझ बढी महिलालाई लक्षित गरेर स्वरोजगारमुखी कार्यक्रम ल्याइने जानकारीसमेत गराएका छन्।