वीरगञ्ज | नेपाल विद्युत प्राधिकरणले वीरगञ्ज–पथलैयाको औद्योगिक क्षेत्र लगायत वीरगञ्जमा संचालनमा रहेका उद्योगहरूमा कुनै सूचना बिना लोडसेडिङ र ट्रिपिङ गर्न थालेपछि वीरगञ्ज उद्योग वाणिज्य संघ (BiCCI) ले गम्भीर ध्यानाकर्षण गराएको छ।
संघद्वारा जारी विज्ञप्तिमा उल्लेख गरिएअनुसार, पछिल्लो समय एकैदिन ५ घण्टा बढी लोडसेडिङ हुनुका साथै १० देखि ११ पटकसम्म विद्युत ट्रिपिङ भइरहेको छ। यसले औद्योगिक उत्पादन क्षमता २० देखि २५ प्रतिशतले घटाएको जनाइएको छ।
२०७४ सालमा नेपाललाई औपचारिक रूपमा लोडसेडिङमुक्त घोषणा गरिए पनि, औद्योगिक क्षेत्रहरूमा पुनः लोडसेडिङ सुरु हुनु अत्यन्तै निराशाजनक भएको संघले जनाएको छ। विद्युत सेवा स्थिर नहुँदा उत्पादन रोकिएको, उपकरण बिग्रिएको र व्यवसाय सञ्चालनमा गम्भीर समस्या उत्पन्न भएको संघको भनाइ छ।
संघका अध्यक्ष हरिप्रसाद गौतमद्वारा हस्ताक्षरित विज्ञप्तिमा राति लोडसेडिङ हुँदा सुरक्षामा समेत चुनौती देखिएको र बिनासूचना लोडसेडिङले औद्योगिक व्यवसाय नै धरापमा परेको उल्लेख छ।
उद्योगहरूले समयमै मागअनुसार उत्पादन गर्न नसक्दा ठूला आर्थिक क्षति व्यहोर्नु परेको, बजारमा आपूर्ति नियमित गर्न कठिन भएको, साथै ठूला उद्योगहरूमा तालाबन्दीको जोखिमसमेत बढेको संघको चेतावनी छ।
नेपाल विद्युत प्राधिकरणले भारतबाट विद्युत आयात गरिरहेकामा पनि उद्योग क्षेत्रमा नियमित आपूर्ति नहुनु आपराधिक लापरवाही हो कि भन्ने प्रश्न उठाउँदै संघले यसप्रति तत्काल ध्यान दिन आग्रह गरेको छ।
संघले सरकारले यस समस्यालाई तुरुन्त सम्बोधन गरी दीर्घकालीन समाधान खोज्नुपर्ने माग गर्दै, आगामी दिनमा यस्ता समस्या नदोहोरियोस् भन्ने सुनिश्चितता गर्न नेपाल विद्युत प्राधिकरणसँग कडाइका साथ माग राखेको छ।
