वीरगंज | वीरगंज उद्योग वाणिज्य संघमा महिला उद्यमशीलता सहायता कक्षको एक विशेष समारोहका बीच उद्घाटन गरिएको छ। समारोहका प्रमुख अतिथि नेपाल उद्योग वाणिज्य महासंघ मधेश प्रदेशका अध्यक्ष अशोक टेमानीले रिबन काटेर सहायता कक्ष उद्घाटन गर्नुभयो।
अध्यक्ष टेमानीले महिला सशक्तिकरण र आत्मनिर्भरता अभिवृद्धिका लागि यस्ता पहल आवश्यक र सराहनीय भएको बताउँदै संघको यो कदमले नयाँ सम्भावनाको ढोका खोल्ने विश्वास व्यक्त गर्नुभयो।
वीरगंज उद्योग वाणिज्य संघका अध्यक्ष हरि प्रसाद गौतमको अध्यक्षतामा सम्पन्न कार्यक्रममा बोल्दै उहाँले महिला उद्यमीलाई आवश्यक सहयोग र सहजीकरण गर्दै जाने संघको प्रतिवद्धता दोहोर्याउनुभयो। उहाँले महिलाको योगदान बिना आर्थिक विकास सम्भव नरहेको उल्लेख गर्नुभयो।
कार्यक्रममा वीरगंज महानगरपालिका कार्यालयका प्रशासकीय अधिकृत अरबिन्दलाल कर्णले सहायता कक्ष सञ्चालनका लागि स्थान उपलब्ध गराउने बताउँदै महानगरपालिकाले यस्ता कार्यक्रमप्रति सदैव सकारात्मक सहयोग रहने धारणा व्यक्त गर्नुभयो।
नेपाल उद्योग वाणिज्य महासंघका महानिर्देशक हरि पौडेलले महिलालाई स्वरोजगारतर्फ उन्मुख गराउन सहायता कक्षले महत्वपूर्ण भूमिका खेल्ने विश्वास व्यक्त गर्नुभयो।
महिला उद्यमशीलता सहायता कक्षका सहजकर्ता संजु कलवारले कक्षमार्फत महिलालाई व्यवसायिक सल्लाह, तालिम, जानकारी तथा प्रोत्साहन प्रदान गरिने जानकारी दिनुभयो।
कार्यक्रममा घरेलु तथा साना उद्योग कार्यालय पर्साका प्रमुख पवन पंजियार, संघका वरिष्ठ उपाध्यक्ष माधव राजपाल, उपाध्यक्ष आशिष लाठ, कोषाध्यक्ष अनोज रुंगटा, सहसचिव अनुप अग्रवाल, महिला समृद्धि नेपाल कार्यक्रम मधेश प्रदेशका सदस्य डा. बासुलाल कर्णलगायत संघका पदाधिकारी तथा व्यवसायीहरुको उल्लेखनीय उपस्थिति रहेको थियो।
