वीरगञ्ज । वीरगञ्ज महानगरपालिकाले चालु आर्थिक वर्ष २०८१/०८२ को सम्पूर्ण योजना तथा कार्यक्रमको भुक्तानी असार १५ गते भित्र सम्पन्न गर्न सम्बन्धित सबै पक्षलाई निर्देशन जारी गरेको छ । महानगरपालिकाका प्रमुख प्रशासकीय अधिकृत अरविन्द लाल कर्णले एउटा पत्र जारी गर्दै आर्थिक कार्यविधि तथा वित्तीय उत्तरदायित्व नियमावली, २०७७ को नियम ३० को उपनियम ७ को प्रावधानलाई पालना गर्न आग्रह गर्दै सम्पूर्ण योजना तथा कार्यक्रमको भुक्तानी असार १५ गते भित्र सम्पन्न गर्न सम्बन्धित सबै पक्षलाई निर्देशन जारी गरेका हुन् ।
प्रमुख प्रशासकीय अधिकृत कर्णले जारी गरेको पत्रमा उल्लेख भएअनुसार, आर्थिक वर्ष समाप्त हुनुभन्दा कम्तीमा ७ दिन अगावै भुक्तानी दिई निकासा र खर्चको अद्यावधिक गरी भुक्तानी निकासा बन्द गर्नुपर्ने कानुनी प्रावधान रहेको छ । असार महिनामा कार्यालयमा चाप बढ्ने, सर्भर डाउन हुने वा प्रणालीमा समस्या आउन सक्ने सम्भावनालाई मध्यनजर गर्दै असार १५ गतेको समय सीमा तोकिएको कर्णले बताए ।

कर्णद्वारा जारी गरिएको पत्रमा भनिएको छ, “नेपाल सरकार र प्रदेश सरकारलाई दाखिला गर्नुपर्ने करहरू, फिर्ता गर्नुपर्ने अनुदानहरूको हिसाब मिलान गरी सम्बन्धित कोष तथा लेखा नियन्त्रक कार्यालयमा फिर्ता गर्नुपर्ने व्यवस्थालाई ध्यानमा राख्दै, महानगरपालिका र मातहतका वडा कार्यालयहरूबाट सञ्चालित सम्पूर्ण योजना र कार्यक्रमको भुक्तानीका लागि मिति २०८२ असार १५ भित्र फाइल पेस गरी फरफारख गर्न गराउन अनुरोध गरिन्छ ।” तोकिएको समय सीमा भित्र भुक्तानीका लागि आवश्यक फाइल पेस गर्न नसकेमा वा भुक्तानी प्रक्रिया पूरा नभएमा महानगरपालिका कार्यालय जिम्मेवार नहुने कर्णले स्पष्ट पारेका छन् । व्यवस्थाले निर्माण व्यवसायी, उपभोक्ता समिति र सम्बन्धित सबै पक्षलाई समयमै कार्य सम्पन्न गरी आवश्यक कागजात पेस गर्न दबाब सिर्जना हुने विश्वास पनि लिइएको छ ।

निर्देशन वीरगञ्ज महानगरपालिकाका सबै महाशाखा, शाखा, वडा कार्यालय र निर्माण व्यवसायी तथा उपभोक्ता समितिहरूलाई सम्बोधन गरिएको छ । महानगरपालिकाले सबै पक्षलाई समय सीमाभित्रै काम सम्पन्न गर्न र आवश्यक प्रक्रिया पूरा गर्न जोड दिएको छ । प्रमुख प्रशासकीय अधिकृत कर्णले पत्रमार्फत आर्थिक अनुशासन र पारदर्शितालाई प्राथमिकता दिएको देखिन्छ । आर्थिक वर्षको अन्त्यमा हुने हतार र प्राविधिक समस्याबाट बच्न कदम चालिएको महानगरपालिकाको भनाइ छ ।