बारा । सिकिन्द्र साह । बारा जिल्लाको सिम्रौनगढ नगरपालिका वडा नम्बर १० स्थित देवापुर टेटा स्वास्थ्य चौकीमा दरबन्दी रहेका अहेब (सहायक स्वास्थ्यकर्मी) पपु यादव वर्षौंदेखि कार्यस्थलमा अनुपस्थित रहेको खुलासा भएको छ।

स्वास्थ्य चौकीमा दर्जा पाएका कर्मचारी नियमित सेवा दिनुको सट्टा नगरपालिकाको कार्यालयमा दिन बिताउने गरेको स्थानीयवासीहरूको गुनासो छ। सेवा लिने नागरिकबाट टाढा रहँदै आएका यादवलाई पालिकामा तलब भत्ता बुझ्न मात्र उपस्थित हुने गरेको वडाबासी बताउँछन्।

वडा नम्बर १० का वडाध्यक्ष राजकुमार यादवका अनुसार, “स्वास्थ्यजस्तो संवेदनशील क्षेत्रको कर्मचारीलाई नगर प्रमुख किशोरी साह कलवारले कार्यालयमै राखेर आफ्नो सुरक्षार्थ प्रयोग गरिरहेका छन्। पटक–पटक गुनासो गर्दा पनि कुनै सुनुवाइ भएको छैन।”

स्वास्थ्य चौकीमा सेवाको अभावका कारण सर्वसाधारण उपचार सेवाबाट वञ्चित हुँदै आएका छन्। यस सम्बन्धमा नगर प्रमुख साहलाई सोध्दा उहाँले कागजी प्रक्रिया पूरा भएमा मात्र स्वास्थ्य चौकीमा कर्मचारी पठाइने प्रतिक्रिया दिनुभयो।

नगरका स्वास्थ्य संयोजक विजय ठाकुरले हाल कर्मचारीको अभाव भएको बताउँदै, “समय मिलाएर पठाउनेछौं,” भन्ने जवाफ दिए। तर वडा कार्यालयका अनुसार पटक–पटक खबरदारी गर्दा पनि अहिलेसम्म कुनै कारबाही नभएको उल्लेख गरिएको छ। स्थानीय बासिन्दाले स्वास्थ्य चौकीमा नियमित सेवा सुनिश्चित गर्न सम्बन्धित निकायको ध्यानाकर्षण गराएका छन्।